Алайда барған мемлекеттің заңдарын және белгіленген талаптарын сақтау жауапкершілігі азаматтың өзіне жүктеледі.
Оның айтуынша, Қазақстан азаматтары шетелде қиын жағдайға көбіне жергілікті заңдарды, соның ішінде визалық, көші-қон, транзиттік және кедендік талаптарды білмеу немесе сақтамау салдарынан тап болады.
«Ең алдымен, бұл рұқсат етілген болу мерзімін бұзу, тыйым салынған немесе декларацияланбаған тауарларды алып өту әрекеттері, сондай-ақ шет мемлекеттердегі транзит және болу ережелерін сақтамау жағдайларына қатысты. Сондықтан отандастарымызды шетелге шығар алдында баратын елдің, сондай-ақ транзиттік мемлекеттердің заңнамасын, визалық және көші-қон талаптарын мұқият зерделеуге шақырамыз. Паспорттардың, визалардың, тұруға рұқсаттардың және басқа да ресми құжаттардың жарамдылық мерзіміне ерекше назар аудару қажет», – деді Жанболат Үсенов.
СІМ өкілі сапар алдында медициналық сақтандыру рәсімдеуді, әуе билеттерін тек ресми сервистер арқылы сатып алуды және әуе компанияларының багаж бен транзитке қатысты талаптарын сақтауды ұсынды.
Сондай-ақ азаматтарға жеке құжаттарын үшінші тұлғаларға бермеу және ішінде не бар екені белгісіз бөтен сөмкелерді, сәлемдемелерді немесе басқа заттарды тасымалдауға келіспеу керектігі ескертілді.
Шетелге емделуге, оқуға немесе жұмыс істеуге баратын азаматтар барлық құжаттарының заңды түрде рәсімделгеніне алдын ала көз жеткізуі тиіс.
«Шетелге емделу, білім алу немесе жұмыс істеу мақсатында шығатын азаматтар барлық құжаттардың, шақырулардың, еңбек келісімшарттары мен рұқсаттардың заңды рәсімделгенін алдын ала тексеруі қажет. Жаппай сапарларды ұйымдастырушылармен жасалған келісімдерді тексеріп, төтенше жағдай туындаған кездегі іс-қимыл жоспарын алдын ала ойластырған жөн», – деді СІМ өкілі.
Жанболат Үсенов Қазақстанның дипломатиялық және консулдық мекемелері шетелдегі азаматтарға өз құзыреті шеңберінде консулдық және құқықтық көмек көрсететінін атап өтті. Алайда барған мемлекеттің заңдарын және белгіленген талаптарын сақтау жауапкершілігі азаматтың өзіне жүктеледі.
«Дипломатиялық және консулдық мекемелер Қазақстан азаматтарына өз құзыреті шеңберінде қажетті консулдық және құқықтық көмек көрсетеді. Алайда азамат жүрген елдің заңнамасын сақтау және белгіленген талаптарды орындау үшін жауапкершілікті тікелей өзі көтереді», – деді Жанболат Үсенов.
Фото: gov.kz
