АҚШ Кубаға қарсы “бірқатар әрекеттерді” жоспарлап отыр және президент Дональд Трамптың тапсырмаларын орындауға дайын. Бұл туралы Stan.kz ақпарат агенттігі “РИА Новостиге” сілтеме жасап хабарлайды.
Мұны Пентагон Кубадағы ықтимал әскери операцияға дайындық жөніндегі хабарламаларға пікір білдіру барысында мәлімдеді.
“Біз гипотетикалық сценарийлерге қатысты болжам жасамаймыз. Министрлік күтпеген жағдайлар туындаған кезде жүзеге асырылатын бірқатар шараларды жоспарлап отыр және президенттің тапсырмаларын орындауға әрдайым дайын”, – делінген хабарламада.
Бұған дейін USA Today басылымы дереккөздерге сілтеме жасап, АҚШ Қорғаныс министрлігі Кубада ықтимал операцияға дайындықты бастағанын хабарлаған.
13 сәуір, дүйсенбі күні Ақ үй басшысы АҚШ Иранға қатысты барлық мәселені шешкен соң Кубаға да “назар аударуы мүмкін” екенін айтты. Ал бір күн бұрын Куба президенті Мигель Диас-Канель ел тұрғындары өз мемлекеті үшін күресуге және жанын беруге дайын екенін мәлімдеді. Сонымен қатар ол Вашингтонмен келісімге келу қиын болғанымен, мүмкін екенін атап өтіп, әскери агрессия ешнәрсемен ақталмайтынын жеткізді.
Қаңтардың соңында Дональд Трамп Кубаға мұнай жеткізетін елдерден импортқа баж салығын енгізуге мүмкіндік беретін жарлыққа қол қойған. Сондай-ақ ол ұлттық қауіпсіздікке төнген қауіпке байланысты төтенше жағдай жариялаған.
ОқыңызСодан бері елде жанармай тапшылығы күшейіп, электр энергиясы жиі өшіріле бастады. Ара-тұра наразылық акциялары да өтіп жатыр. Ал Куба билігі Вашингтон энергетикалық блокада арқылы ел экономикасын әлсіретіп, халықтың тұрмысын қиындатуды көздеп отыр деп мәлімдеді.
The Wall Street Journal басылымының мәліметінше, АҚШ әкімшілігі 2026 жылдың соңына қарай Кубада билікті ауыстыруды көздейді. Алайда АҚШ мемлекеттік хатшысы Марко Рубио бұл ақпаратты жоққа шығарып, Куба басшысын құлату жоспары туралы мәліметті жалған деп атады.
