Қазақстандық ата-аналар ұлдарын белгілі бір жасқа жеткенде сүндетке отырғызады. Сол кезде дәрігер таңдап, қызмет құнын салыстыра бастайды. Kazinform агенттігінің тілшісі аймақтардағы бағаны білді.
Қазақстандағы жеке емханалар және мемлекеттік ауруханаларда сүндетке отырғызу қызметі бар. Бағасы қызмет түріне қарай ерекшеленеді. Хирургтер ұлдарды лазермен және дәстүрлі түрде пішеді. Сонымен бірге ота жасау кезінде балалар ойын ойнайды немесе мультфильм көреді. Рейтинг жасау кезінде хирург кеңесі мен қажетті анализ тапсыру құнын қоспай, тек сүндетке отырғызу бағасы таңдалды.
Тараз, Павлодар мен Атырауда қызмет құны ең төмен болып шықты. Мұнда баға 10 мың теңгеден басталады.
Шымкентте хирургтердің қызметі сәл жоғары. Қазір 12 000 теңге болып тұр. Кішкентай балаларды ғана емес, ересек ер адамдарды да піштіреді. Көбіне медициналық көрсеткіш себеп болып жатады. Шымкентте бұл қызмет құны 30 мыңнан басталып, 50 мың теңгеге дейін жетеді.
Көкшетау, Ақтау, Қостанай мен Талдықорғанда сүндетке отырғызу құны 15 мың теңгеден басталады.
Содан кейінгі орында Ақтөбе тұр. Мұнда сүндетке отырғызу қызметі 18 000 теңгеден басталады. Бала Sony PlayStation ойнайтын болса, жеке емханалар 25 000 теңге сұрайды.
Түркістан, Жезқазған, Семей, Қызылорда қалаларында қызмет құны 20 мың теңгеден басталады. Түркістанның кейбір ауылында сүндетке отырғызу тегін. Тек өзіңіз сый-құрмет көрсетсеңіз болады.
Ал Қызылордада хирургтің сүндетке отырғызу қызметі тек жеке емханаларда бар. Ал облыстық балалар ауруханасында бұл қызмет қарастырылмаған.
Бағасы жоғары өңірлердің үштігіне Өскемен мен Астана кіреді. Мұнда сүндеттеу қызметі 25 мың теңгеден басталады. Ел астанасында баланың жайлылығы үшін қосымша 10-15 мың теңге төлеу керек.
Рейтинг бойынша екінші орында Қарағанды, Орал мен Алматы қалалары тұр. Мұнда баға 30 мыңнан басталады. Алматыдағы кейбір клиникада сүндетке отырғызу қызметі 100 мың теңгеге дейін жетеді.
Елімізде сүндетке отырғызу қызметінің ең қымбаты Петропавлда болып шықты. Мұнда хирург қызметі 35 мың теңгеден басталады.
Айтып өтейік, кейбір клиникада хирург, анестезиологтан кеңес алу, анализ тапсыру міндеттеледі. Мұның әрбіріне бөлек-бөлек ақша төлеу керек.
Инфографика: Kazinform
Kazinform бұған дейін электрик пен сантехниктің қызмет ақысын білді.
https://kaz.inform.kz/news/kazakstanda-sundetke-otirgizu-kizmet-kansha-turadi-a3ae1e/?fbclid=IwY2xjawJNQGFleHRuA2FlbQIxMQABHeeYHMXZt4spigyFnpU6agUk8ysgSNfN6G8t2HxlYUOLOCFm5inOHuvp0A_aem_CBDCGFZqhGAAN5xa58BoZA
Коллаж: Canva / «Жалағаш жаршысы» газетінің сайты
