Өткен аптада Қылышбай ауылындағы Ә.Төлепбергенов атындағы орта мектебінде еңбегімен елге танылған Ә.Төлепбергеновтің 100 жылдық мерейтойына орай ұрпақтарының демеушілігімен музей бөлмесінің ашылу рәсімі болды. Оған аудан әкімінің орынбасары Мейірхан Төлеулиев, аудандық білім бөлімінің басшысы Мәлік Мұқашев, «АМАNАТ» партиясы аудандық филиалының төрағасы Манарбек Көшкімбаев, «Тараз» үштігінің жетекшісі, ауданымыздың Құрметті азаматы, Қазақстанның еңбек сіңірген қайраткері Асылхан Шүңіреков, ауданның Құрметті азаматтары Шахикерім Исабеков, Мұратхан Естаев, ауыл тұрғындары, ұстаздар, Ә.Төлепбергеновтің жары Тілеукүл апай, ағайындары, құда-жекжаттары, ұлдары-қыздары, немере, шөберелері, мектеп оқушылары қатысты.
Музей бөлмесінің лентасын қию рәсімін Тілеукүл апай, құдасы Елубай Батырбеков, аудан әкімінің орынбасары Мейірхан Төлеулиев, аудандық білім бөлімінің басшысы Мәлік Мұқашев жасады. Содан соң рәсімге жиналған көпшілік музей бөлмесіне қойылған Әлтай Төлепбергеновтің өмірі мен еңбегіне арналған құнды деректер, еңбек жолынан сыр шертетін фотоматериалдар, жәдігерлермен танысты. Екі мәрте Социалистік Еңбек Ері Жазылбек Қуанышбаевтың шәкірті, қарапайым еңбегімен елге танылған, Ленин және екі мәрте Еңбек Қызыл ту орденінің иегері, атақты шопан Әлтай Төлепбергенұлы 1925 жылдың 16 қыркүйегінде Қылышбай ауылының батыс жағындағы Бөшен деген жерде дүниеге келген.
Әкесі Төлепберген жастайынан мал баққан орта шаруа момын кісі болғанымен, бір айтарлығы бар ауылдың сыйлы кісісі болған. «Ат тұяғын тай басар» демекші әке ісін жалғастырушы Әлтай 12 жасынан туған өлкесі Мойынқұм өңірінде шопан болып еңбек жолын бастайды. Ол өзіне бекітілген малдың 98 пайызын аман сақтап, әр 100 аналық бастан 150-170-тен қозы алып, 3,9 килограм жүн қырқып, өткізілген қаракөл елтірісінің бірінші сорттылығын 75 пайызға жеткізген. Осындай еңбегі үшін екі рет 1973 және 1977 жылдары «Еңбек Қызыл ту», 1982 жылы «Ленин» ордендерімен марапатталған. «Ауыл шаруашылығының еңбек сіңірген қызметкері» деген атаққа ие болып, Бүкілодақтық Халық шаруашылығы көрмесінің қола, күміс, алтын медальдарымен, аудандық, облыстық, республикалық, бүкілодақтық деңгейдегі бірнеше рет Құрмет грамоталары және Алғыс хаттармен марапатталған.
Ауданымыздың есеюі мен өркендеуі жолындағы іс-тәжірибесін баяндайтын «Мойынқұмда жайлауым» атты кітаптың авторы. Еңбек майталманы Әлтай атаның адал жары Тілеукүл апай бүгінде 10 балаға тәлім-тәрбие берген ардақты ана ретінде ұлын ұяға, қызын қияға қондырып, үлкен бақытқа кенелген жанұя тірегі, зейнеткер ана. Әлтай Төлепбергенұлы 1991 жылы қайтыс болды. Ардақты азаматтың еңбек пен істерін кейінгі қалған ұрпақтарға мақтан етіп, мәңгілікке есте қалу мақсатымен Қылышбай ауылындағы бір көшеге және ауылдағы мектепке есімін берген. Музейдің ашылу сәтінде сөз алған аудан әкімінің орынбасары Мейірхан Төлеулиев «Бүгін біз еңбекпен елге үлгі болған, Мойынқұмның мәртебесін көтерген ардақты азамат – Әлтай Төлепбергенұлының 100 жылдық мерейтойына жиналып отырмыз. Бұл – баршамыз үшін ерекше күн. Әлтай ағамыздың өміржолы жас ұрпаққа өнеге, ол адал еңбек пен табандылықтың символы болды. Шопандықты жанының ісі етіп, қажырлы еңбегімен биік дәрежеге жетті. Осындай тұлғалардың өмірі – біздің елдің тарихы, ауылдың абыройы. Бүгін мектеп жанындағы мұражай бөлмесінің жаңартылып, еңбек адамының өмірін насихаттайтын орынға айналуы – үлкен қуаныш. Бұл жас ұрпақтың бойына еңбекқорлық пен отансүйгіштік қасиеттерін дарытатыны сөзсіз. Еңбегімен елге үлгі болған Әлтай ағамыздың есімі ұмытылмай, мәңгі құрметпен атала берсін! Осы шараны ұйымдастырған ауыл әкімдігіне, мектеп ұжымына және ардақты ағамыздың ұрпақтарына шынайы алғыс білдіремін. Еңбек еліне данқ, еңбегімен елге өнеге болған азаматтың рухы мәңгі жасай берсін! деді.
Содан кейін сөз алған ауданның Құрметті азаматы Мұратхан Естаев, «АМАNАТ» партиясы аудандық филиалының төрағасы Манарбек Көшкімбаев, ауданның Құрметті азаматы, Қазақстан Республикасына еңбегі сіңген қайраткер, «Тараз» үштігінің жетекшісі Асылхан Шүңіреков, атаның құдасы Әлшері Мәмешов, Қылышбай ауылының ардагерлері, мектеп жанындағы қамқоршылар кеңестерінің төрағасы Бодаубек Жүндібаев, мектеп ұстаздары Света Сакиева, Перизат Шуылдақова Әлтай ағаның жары Тілеукүл апа мен ұлы Балтабай Төлепбергенов сөз алып, Әлтай ағаның өмір сүрген кезеңдерінен естеліктер айтты.
Содан соң іс-шара «Еңбекпен өткен өмір – ұрпаққа өнеге» атты іс-шараға жалғасты. Мұнда мектептің ән-күй пәнінің мұғалімі Нұрболат Манарбекұлы Шікетаевтың басқаруындағы «Алмас қылыш» ансамбілінің орындауындағы «Әлқиса», Әбдімомын Желдібаевтың «Ерке сылқым» күйлеріне, Әйгерім Елеубектің орындауында «Анамның ақжаулығы», Ұлжан Әбдіманованың орындауындағы «Әке», Нұрболат Шікетаев пен Данышпан Иетаеваның орындауындағы «Уақыт» әндеріне, мектептің жас ұстаздары қойған тәуелсіздік композициясына, 5-6 сынып оқушылары үш тілде шырқаған «Арманға сен» әніне, «Еңбек ері Әлтай ата» көрінісіне (рөлдерді ойнағандар: Әлтай ата – Нұрболат Шікетаев, апай – Шакира Сүлейменова, немересі Кәрібай Нұрмұқасан, досы – Әзімқұл Дәрмен), Әлтай атаға арнаған арнау өлеңдерін оқыған мектеп ұстаздарына мерейтойлық іс-шараға жиналған қауым ыстық ықыласпен қол соғып, қошемет көрсетті. Содан соң «Мақтаныштар шеруі бөлігінде мектеп оқушыларының түрлі байқаулар мен олимпиадаларында жеткен жетістіктері көпшіліктің назарына ұсынылды. Түс мезгілінде аудан орталығындағы «Бақсарай» мейрамханасында ас беріліп, марқұм Әлтай Төлепбергеновтың рухына құран бағышталды.
Даңқты шопан Әлтай Төлепбергеновтің 100 жылдығына арналған мерейтойлық іс-шара түстен кейін тай бәйгесі мен көкпарға ұласты.
Жолдыбай ДӘМЕТОВ,
Мойынқұм ауданы
