Тараз қаласындағы «Бақытты болашақ» оқушылар сарайында «Бала қауіпсіздігі – басты назарда!» тақырыбында ата-аналар форумы өтті.
Жиынның негізгі мақсаты – жасөспірімдер арасындағы аутодеструктивті мінез-құлықтың алдын алу, балалардың өмірі мен денсаулығын қорғау, сондай-ақ бала тәрбиесіндегі ата-ана мен қоғамның жауапкершілігін арттыру. Форум жұмысына ата-аналар мен кәмелетке толмағандардың істері жөніндегі инспекторлар қатысты.
Форумды Тараз қаласы әкімінің орынбасары Улана Сламбекова модераторлық етті. Алғашқы сөз Жамбыл облысы әкімдігінің балалардың құқықтарын қорғау басқармасының басшысы Эльмира Мырза-Ғалиға берілді.
Іс-шара барысында ата-аналарға жасөспірімдердің психологиялық жағдайын дер кезінде байқап, оларға қолдау көрсетудің маңызы түсіндірілді. Қатысушыларға «Өмір сақшылары» бейнематериалы көрсетіліп, одан кейін ашық диалог ұйымдастырылды. Ашық пікір алмасу кезінде бала қауіпсіздігі, психологиялық қолдау орталығының жұмысы және «Емдеу» қосымшасы туралы ақпарат берілді.
Сонымен қатар Қызылорда облыстық денсаулық сақтау басқармасының бас маманы, психолог, ЮНИСЕФ бойынша мастер-тренер Мира Мырзаханова жасөспірімдер арасындағы суицидтің алдын алу тақырыбында баяндама жасады. Мамандар баланың эмоционалдық жағдайына назар аударып, қажет болған жағдайда дер кезінде көмекке жүгінудің маңыздылығын атап өтті.
Форумда отбасының жасөспірімнің эмоционалдық қауіпсіздігін қамтамасыз етудегі рөлі де кеңінен сөз болды. №18 орта мектептің ата-аналар комитетінің өкілі Ульяна Батракова «Рядом, когда трудно: роль семьи в эмоциональной безопасности подростка» тақырыбында баяндама жасады. Ал педагог-психолог Мария Суворина жасөспіріммен сенімді қарым-қатынасты қалыптастыруға арналған шеберлік сыныбын өткізді.
Жиынның практикалық бөлігінде ата-аналар «Балаңызды қаншалықты жақсы білесіз?» атты интерактивті ойынға қатысып, бала мен ата-ана арасындағы қарым-қатынасты нығайтуға бағытталған тапсырмаларды орындады. Сонымен бірге «Егер балаңыз сөйлей алса…» тақырыбында психологиялық тренинг ұйымдастырылды.
Форум соңында бала қауіпсіздігі ең алдымен сенімді қарым-қатынастан басталатыны айтылды. Мамандардың пікірінше, ата-ана баланың көңіл-күйіндегі өзгерістерге бейжай қарамай, оны тыңдап, түсініп, қиын жағдайда жанынан табыла білуі қажет.
Айта кетейік, форум 7-9 қыркүйек аралығында Тараз қаласында ұйымдастырылып, бала қауіпсіздігіне қатысты өзекті мәселелерді ата-аналармен бірлесіп талқылауға бағытталды.
