Қазақстанда ипотекалық қарызын өтеуде қиындыққа тап болған азаматтардың қосымша көмек сұрап өтініш беру мерзімі ұзартылды. Енді бағдарлама талаптарына сай келетін қарыз алушылар 2027 жылғы 1 шілдеге дейін банкке, Қазақстан тұрғын үй компаниясына немесе бағдарламаға қатысатын басқа ұйымдарға жүгіне алады. Қаржы нарығын реттеу және дамыту агенттігі тиісті қаулыны 2026 жылғы 28 қыркүйекте қабылдаған. Белгіленген мерзімге дейін азаматтар қосымша көмек сұрауға, несие шарттарын жеңілдету, тұрғын үйді қаржыландыру немесе жалға алу мәселелері бойынша өтініш бере алады. Өтінішін уақытында тапсырған азаматтарға көмек 2027 жылғы 1 қыркүйекке дейін көрсетілуі мүмкін.
Қаулыда 2021 жылғы 1 қаңтардан 2024 жылғы 31 желтоқсанға дейін берілген кейбір ипотекалық несиелерді қайта қаржыландыру мүмкіндігі де қарастырылған. Бірақ бұл мүмкіндік барлық қарыз алушыға бірдей берілмейді.
Қарыз алушы 2025 жылғы 1 қаңтардағы жағдай бойынша әлеуметтік осал топтардың біріне жатуы немесе бағдарламада көрсетілген аурулардың бірімен ауыруы керек. Ипотекаға алынған баспана қарыз алушы мен оның жұбайының Қазақстандағы жалғыз тұрғын үйі болуы қажет. Сонымен бірге төлем мерзімін өткізіп алу уақыты 180 күннен асуға, негізгі қарыз қалдығы 50 миллион теңгеден көп болмауға тиіс. Азаматтың табысы да несиені бұрынғы талаппен өтеуге жетпейтіні ескеріледі. Осы талаптардың барлығы орындалса, комиссия несиені қайта қаржыландыруды ұсына алады.
Бағдарлама аясында осы уақытқа дейін шамамен 60 мың ипотекалық қарыз алушыға қолдау көрсетілген. Қолдау көлемі 678 миллиард теңгеге жеткен. Агенттік мәліметінше, төлемі 90 күннен астам кешіккен ипотекалық қарыздардың үлесі 2015 жылғы 30 пайыздан 2026 жылғы 1 маусымда 0,6 пайызға дейін азайған.
