Биыл ардагерлер ұйымының құрылғанына 40 жыл толып отыр. Бұл қарттарымыздың қоғамдағы рөлін айқындайтын кезең. Осы орайда, бүгін Ұ.Сыздықбайұлы ауылында ардагерлер үйінің ашылуы өтті. Шараға аудан әкімі Сәкен Мамытов, облыстық ардагерлер кеңесі төрағасының орынбасарлары Жаңабай Миллионов пен Қонысбай Ильясов, аудандық ардагерлер кеңесінің төрағасы Серік Аппазов, қоғамдық кеңес төрағасы Сахарап Қырғызбаев, аудандық билер кеңесінің төрағасы Жандарбек Қалмырза мен кеңес мүшелері және ауыл тұрғындары қатысты.
Аудан басшысы Сәкен Үмбетұлы құттықтау сөз сөйлеп, ардагерлердің қоғамдағы рөліне тоқталды. Сонымен қатар, жаңадан ашылып отырған ардагерлер үйінің ауыл үшін маңызды екенін айтты. Мұнан соң облыстық ардагерлер кеңесі төрағасының орынбасары Жаңабай Миллионов та ізгі тілегін жолдады. Шарада аудандық мәдениет үйінің әншісі Ахат Кенжебаев ардагерлерге арнау әнін шырқады.
Ауыл азаматтарының демеушілігімен ашылған орталықта ардагерлердің бос уақытын тиімді ұйымдастыруға арналған қолайлы жағдай жасалып отыр. Ардагерлеріміздің елдік мәселелерге үн қосып, кейінгі буынға батасын беріп, қоғамдық жұмыстарға белсенді қатысуы – үлкен өнеге.
