Алматы облысы Еңбекшіқазақ ауданына жұмыс сапарымен барып, Д. Қонаев атындағы Үлкен Алматы каналының учаскелерін реконструкциялау жұмыстарының нәтижесімен таныстым.
Айта кетсем, биыл каналдың жалпы ұзындығы 1,53 шақырым болатын апатты учаскелерін реконструкциялау жұмыстары аяқталды. Су шығынын азайту және 33,3 мың га жерді сапалы суаруды қамтамасыз ету мақсатында арнаны монолитті темірбетонмен қаптау жұмыстары жүргізілді.
Жоба нәтижелерімен танысып, министрлігіміздің Су шаруашылығы комитетіне нысанды пайдалануға түпкілікті қабылдамас бұрын мұқият тексеруді тапсырдым. Сонымен қатар Үлкен Алматы каналының басқа учаскелерін реконструкциялауға қажетті құжаттарды әзірлеу жұмыстарын уақытылы аяқтау қажет.
Еске сала кетсем, министрлігіміздің жоспарында Үлкен Алматы каналын үш кезеңмен реконструкциялау бар. Қазіргі уақытта ұзындығы 15,6 шақырым болатын учаскені бетондау жобасы әзірленді.
Сонымен қатар жалпы ұзындығы 110 шақырым болатын басқа учаскелерді реконструкциялауға қажетті құжаттар әзірленіп жатыр. Жұмыстың үшінші кезеңінде Үлкен Алматы каналының бас су құрылысы жөнделеді.
Каналды реконструкциялау оның өткізу қуатын жобалық көрсеткішке дейін жеткізуге және Алматы облысының суармалы жерлеріне су беруді жақсартуға мүмкіндік береді.
