Нұргүл Ахтлеуова — Атырау қаласындағы Нұрсая мөлтекауданында мемлекеттік бағдарлама аясында үй жалдап тұрады. Кішкентай кезінде төртінші қабаттан құлаған Нұргүлдің денсаулығы өсе келе сыр беріп, осы жылы жүре алмай қалған.

Наурызға дейін жұмыс істеп, ауруы шыдатпағаннан соң Нұр-Сұлтанға барып, жанбасына операция жасатқан. Нұргүл маусым-тамыз аралығында атаулы әлеуметтік көмекті алып тұрған. Алайда қыркүйектен бері көмектен қағылған.

— Қыркүйекте жұмыс орным маған 142 мың теңге «больничный» төледі. Мүгедектігіме байланысты 89 мың теңге зейнетақы алдым. Алимент төлемей жүрген жолдасым 50 мың теңге төледі. Осының бәрін есептеп келе, белгілі межеден 90 теңге асып кеткен. Балаларды мектепке дайындау, азық-түлік, пәтерақы мен тұрмыстық шығындар бар. Аз ақша емес қой. Енді қыстыгүні ақшасыз отырмыз, — дейді үш баланың анасы Нұргүл Ахтлеуова.

Нұргүл еңбекке жарамсыз. Сол себепті қосымша ақша табу үшін жұмысқа шыға алмайды. Атаулы әлеуметтік көмекті 7000-40000 теңге аралығында алып тұрған. Енді Нұргүл кімнен көмек сұрайтынын білмейді. Өйткені қыстыгүні шығындары да артады, аяғына байланысты далаға да шығу қиын.