Елбасы Нұрсұлтан Назарбаев «Болашаққа бағдар: рухани жаңғыру» атты мақаласында «Туған жердің әрбір сайы мен қырқасы, тауы мен өзені тарихтан сыр шертеді. Әрбір жер атауының төркіні туралы талай-талай аңыздар мен әңгімелер бар. Әрбір өлкенің халқына суықта пана, ыстықта сая болған, есімдері ел есінде сақталған біртуар перзенттері бар. Осының бәрін жас ұрпақ біліп өсуге тиіс» дей келе туған жердің мәні мен маңызына айрықша тоқталған болатын. Міне, маңызды мақала жарияланған уақыттан бері жер-жерде көптеген жұмыс атқарылып келеді. Әр өңір, әр ауыл тарихын түгендеп, өзінің біртуар перзенттерін ұрпақ санасына сіңіруге кірісті.
Қандай мамандық иесі болмасын ол мұғалім алдынан тәрбие алып, үлкен өмір жолына қадам басады. Мектептен алған тағылым шәкірттің өмір бойғы ізгі жолына бағдаршам іспеттес.
«Ұстаздық еткен жалықпас, үйретуден балаға» деп дана Абай айтқандай жүрегі жұмсақ, көңілдері таза жандар оқушыларының бойына білім нәрін егіп, тынбай еңбек етеді. Ата-анадан кейінгі балаға жақын болатын да солар. Үйретеді, өмірге қанат қақтырады. Кез келген азаматтан сұрай қалсаңыз, ұстазы жайлы қимастық сезіммен әңгіме айтады. Оның ғибратын, санаға құйған сәуле нұрын сезінгендігін жеткізеді.
Осы орайда аудандық «Рухани жаңғыру» жобалық офисінің «Ұрпақтар жалғастығы» жобасы аясында Ұйым ауылындағы №11 Сарысу колледжінде «Ардагер ұстаздар» аллеясы салтанатты түрде ашылды. Аллеяның №11 колледж аумағынан ашылуының өзіндік мәні бар. Себебі аллея дәл осы колледжді абыройлы басқарып, негізін қалаған ардагер ұстаздар құрметіне арналған.
Мұндағы басты мақсат – еліміздің Тұңғыш Президенті– Елбасы Нұрсұлтан Әбішұлы Назарбаевтың «Туған жерге туыңды тік!» атты бастамасы аясында, елі үшін еңбек еткен ұстаз деген ұлы есімді ұрпақтар жадында мәңгі қалдыру. Бұл тұрғыда колледж жастары, жалпы ауыл тұрғындары жаңа аллеяны алдағы уақытта күтіп-баптау ісінде қалыс қалмаймыз деп отыр.
Осы салтанатты шарада ауыл ақсақалы Орынтай Дүйсенов кіріспе сөз сөйлеп, аудан әкімі Қанатбек Мәдібек игі істі абыроймен атқарған ардагер ұстаздар ұрпақтарына алғысын білдіріп, тұрғындарды құттықтады.
Аллеяның лентасын қию құрметіне елге сыйлы қария Мысықбай Әбдіқалықов пен аудандық ардагерлер кеңесінің төрағасы Жанат Жұмаділдаев ие болды.
Расында, туған жерді қасиет тұту – асыл ұғым. Шара барысында бала жанының бағбаны бола білген азаматтардың өздері ортамызда болмағанымен, олардың ізгілікті ісі жалғасып келе жатқандығы тілге тиек етілді.
Дариха Үмбетиярова,
Сарысу ауданы әкімінің баспасөз хатшысы
