Елбасының «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауында «Сыбайлас жемқорлықтан ада өңірлер» жобасы аясында Астана қаласының жемқорлыққа қарсы тәжірибесін барлық өңірлерге енгізу тапсырылған болатын. Осыған орай облыс әкімдігі өткен жылдың соңында «Жамбыл – адалдық алаңы» жобасын жандандырған еді. Бүгінде бұл бастама өз жемісін беруде. Осынау игі қадамның жалғасы ретінде күні кеше Мемлекеттік қызмет істері агенттігінің облыс бойынша департаменті мен Тараз қаласы әкімдігінің бірлескен «Сервистік әкімдік» қызметі іске қосылды. «Жамбыл – адалдық алаңы» жобасы аясында Жүнісәлиев көшесі №1 мекенжайы бойынша ашылған кеңсені қала басшысы Қайрат Досаев арнайы аралап, жұмысына сәттілік тіледі, – деп хабарлайды «shanyraqinfo.kz» ақпарат агенттігі.
– «Сервистік әкімдік» қызметінің негізгі мақсаты – халыққа қолайлы әрі тиімді жағдай туғызу. Екі мекеменің қызметін біріктіру арқылы, біз «бір терезе» қағидасы шеңберінде тұтынушылардың уақытын үнемдеуді ойлап отырмыз. Бүгінде халық шағын және орта кәсіп ашу, жер рәсімдеу сынды сауалдарымен әкімдікке көп қайырылатыны белгілі. Енді бұл жұмыстарды «Сервистік әкімдік» кеңсесі атқаратын болады. Әрі бұл қызмет ашық және жемқорлық факторларынан алшақ болады. Жаңа орталықтың жұмысына тек сәттілік тілеймін, — деді қала әкімі кеңсе жұмысымен танысу барысында.
Жалпы мұнда Тараз қаласы әкімдігі жер қатынастары мен қалалық сәулет және қала құрылысы бөлімінің мамандары бір жерге шоғырландырылып, «Ореn space» форматында халыққа қызмет көрсетеді. Бұл мемлекеттік қызметтің сапасын арттырып ғана қоймай, халықтың цирфлық сауаттылығын да жақсартады. Сондай-ақ енді халық әр есікті қағып, бір қағаз үшін бөлім-бөлімдерді аралап табан тоздырмайды. «Сервистік әкімдік» қызметінің басты ерекшелігі де осында.
– Бұл «Сервистік әкімдік» орталығы арқылы қала тұрғындары консультативті көмек алып, түйткілді мәселелерінің шешімін таба алады. Ашық әйнекпен қапталған орталықтар арқылы атқарушы орган өкілдеріне алдын-ала тіркелмей-ақ, тұтынушылар аптаның кез келген күні келуіне болады, – дейді Мемлекеттік қызмет істері және сыбайлас жемқорлыққа қарсы іс-қимыл агенттігі облыс бойынша департаментінің басшысы Равиль Төлебаев.
