Гиппократтың антына берік, Европаға Авицена атымен, яғни жиырма бірінші ғасырдың тілімен айтқанда «Адам жанының инженері» — ақ халатты абзал жандарға деген қоғамның құрметі ерекше. Басты байлық денсаулық болса, бірінші мамандық- дәрігер.
Бүгін аудандық мәдениет үйінде медицина қызметкерлері күніне орай, салтанатты шара өтті. Жиынға аудан әкімі Сәкен Мамытов, аудандық мәслихат төрағасы Шаттық Мұсабеков, аудандық ардагерлер кеңесінің төрағасы Серік Аппазов пен кеңес мүшелері, мекеме, бөлім басшылары мен аудандық орталық аурухананың ұжымы қатысты.Алдымен келген қонақтарға фойеде аудандық кітапхананың қызметкерлері медицина саласына арналған кітап көрмесімен таныстырды. Шара шымылдығы «Айжанқыз» халықтық бишілер ұжымының «Қазақ» биімен ашылды. Салтанатты жиында аудан әкімі Сәкен Мамытов құттықтау сөз сөйлеп, маңызды сала мамандарына зор денсаулық, қажымас қайрат тіледі. Мұнан соң аудандық мәслихат төрағасы Шаттық Мұсабеков, аудандық орталық аурухананың бас дәрігері Айнұр Каликова ізгі тілектерін жолдап, медицина саласының маңыздылығына тоқталды.Жиында ауданның медицина саласына сіңірген еңбегі үшін бірқатар қызметкерлер мен сала ардагерлеріне Қазақстан Республикасы денсаулық сақтау министрлігінің«Еңбек ардагері» төсбелгісі, Қазақстан Республикасы денсаулық сақтау министрлігінің Құрмет грамотасы, «AMANAT» партиясының атқарушы хатшысы Дәулет Кәрібектің Алғыс хаты, «Ауданға сіңірген еңбегі үшін» төсбелгісі, Жамбыл облысы әкімінің, Сарысу ауданы әкімінің және «AMANAT» партиясы аудандық филиалының Құрмет грамотасы мен Алғыс хаттары, Жамбыл облысы мейіргер ісі мамандарының кәсіби — Қоғамдық бірлестігінің «Шапағат» төсбелгісі және аудандық орталық аурухананың бас дәрігерінің Алғыс хаттарымен марапатталып, бағалы сыйлық тапсырылды.
Шара концерттік бағдарламаға ұласып, эстрада жұлдызы Наркенже Серікбаева әннен шашу шашып, көпшіліктің ықыласына бөленді. Аудан басшысы әншіге құрмет көрсетіп, сый-сияпат жасап, иығына зерделі шапан жапты. Сонымен қатар, аудандық мәдениет үйінің әншілері «Ақ халатты абзал жандар», «Сарысу» триосы «Өз елім» әндерін шырқаса, «Айжанқыз» халықтық бишілер ұжымы «Хорезм» биін мың бұрала биледі.
Сарысу ауданы
