Мемлекет басшысы Қасым-Жомарт Тоқаевтың бастамасымен «BIRGE» жалпыұлттық акциясы бастау алған болатын. Бұл халықтың тілектері мен ұсыныстарын жинақтайтын, әрбір қазақстандыққа өтініш, ой-пікірлерін ашық жеткізуге мүмкіндік беретін тың бастама. Акция шеңберінде облыс бойынша 32 мыңнан аса ұсыныс-тілектер жинақталып, арнайы сайтқа енгізілді, – деп хабарлайды «shanyraqinfo.kz» ақпарат агенттігі.
Ұсыныстардың дені жұмысқа орналасу, атаулы әлеуметтік көмек алу, коммуналдық төлемдер мен әлеуметтік мәселелер. Сонымен қатар шалғай елді мекендерге ауызсу мен газ тарту мәселелері де «тілектер» тізімінде.
Акция аясында жиналған ел азаматтарының ұсыныстарын жүзеге асыру, орындау бойынша нақты тапсырма берілді. Ендігі кезеңде оның орындалуын «Nur Otan» партиясы тікелей бақылауға алады. Қазір 32 мыңнан аса жиналған талап-тілектер сараланып, сұрыпталып, тиісті органдарға жолдануда.
Мәселен, Жуалы ауданының тұрғындары елді мекенді газдандыру мәселесі бойынша өтініш жазған. Оның орындалуы бойынша бүгінде тиісті жұмыстар жасалды. 15 елді мекенді (Шымбұлақ, Қосмұрат, Майбұлақ, Тасбастау, Кәріқорған, Қоңыртөбе, Күреңбел, Қаратас Ертай, Көлтоған, Рысбек батыр, Ақтасты, Қошқарата, Қызтоған, Шақпақ стансасы) газдандыру бойынша республикалық және жергілікті бюджетке сұраныс жасалып, барлығы 760,5 миллион теңге қаралған. Бұл Тасбастау ауылына дейінгі негізгі құбырдың құрылысын жүргізуге қажетті қаржының жартысын құрайды. Қазіргі таңда конкурс жарияланып, мердігер анықталуда.
Сонымен қатар ауыл арасындағы, яғни Шымбұлақ, Қосмұрат, Майбұлақ елді мекендеріне газ құбырларының құрылысына жобалық-сметалық құжат әзірлеуге облыстық бюджеттен биылға 14 481 мың теңге бөлінген. Алдағы уақытта жұмыс жүргізіліп, мәселе оң шешімін таппақ.
Жалпы газдандыру күн тәртібінде тұрған маңызды мәселелердің қатарынан түскен емес. Қазіргі таңда аймақтағы 377 елді мекеннің 181-і газдандырылған болса, қалған 196 елді мекенге көгілдір отын жеткізу 2019-2027 жылдарға жоспарланған.
5 ауданда 81 елді мекенді (101 мың адам) газдандыру жұмыстары басталды (жыл соңына 9 елді мекенде жұмыстар аяқталады). Бұдан бөлек,бюджеттік бағдарламаларды тоспай мердігермен тікелей келісім шарт арқылы газ тарту мәселесін қарастырылып отыр.
Бұрын бір аулаға шаққандағы жұмыстың құны 470 пен 650 мың теңге аралығында болатын. Коммуналдык 2 мекемеге – «Жамбыл жылу», «Темір жол жылуға» арнайы лицензия алып беріп, бұл бағаны 300 мың теңгеге дейін түсіріп отырмыз. Осының нәтижесінде қосымша 32 мың халық газға қол жеткізетін болады.
