Жамбыл облысында мемлекеттік қызметке орналасуда әңгімелесуді онлайн режімде өткізу тәжірибесі қолға алынды, – деп хабарлайды «shanyraqinfo.kz» ақпарат агенттігі.
Ағымдағы жылдың алғашқы жартысында бос лауазымдық қызмет орнына жүргізілген 583 тағайындаулардың 75 пайызы конкурс арқылы, 3 пайызы сайлау нәтижесімен іске асырылған. Ал қалғаны мемлекеттік органның құрылымдық және штаттық өзгерістеріне байланысты орын алатын мемлекетті қызметшілерді әлеуметтік қорғау шаралары бойынша тағайындалған. Бүгінгі таңда «командалық ауысуларға» жол беретін конкурстан тыс ауысу тәртібімен тағайындау түбегейлі жабылды десе болады.
Осы жылдың 6 айында облыстық мемлекеттік органдар тарапынан жарияланған 824 бос лауазымдарға 859 үміткер қатысып, нәтижесінде 437 жеңімпаз анықталыпты. Оның ішінде ішкі конкурстардың нәтижесімен меритократия негізінде 71 пайыз қызметші жоғары лауазымдарға тағайындалыпты. Бұл ретте, жоғары лауазымдарға өткендердің үлесі алдыңғы жылмен салыстырғанда 6,8 пайызға артқан.
– Жалпы, конкурстық іріктеудің аса маңызды тұсы – оның әділ өтуі.
Әділеттілікті қамтамасыз ету мақсатында бүгінгі таңда облысымызда әңгімелесу процессін «Фейсбук» желісінен тікелей көрсетілім арқылы жариялау қолға алынғаны белгілі. Облысымызда өткен конкурстарға 100 пайыз байқаушылар қатысқан. Дегенмен, меритократия қағидаттарын әлі де күшейту қажеттілігі бар. Бұл үшін біз ішкі конкурсы жарияланатын мемлекеттік органның қызметшілері арасында мансаптық ілгерілеу мүмкіндіктері мен оған құштарлығын білу мақсатында сауалнама алуға көштік. Яғни, тиісті ақпарат алынған соң, олардың конкурсқа міндетті қатысуын қадағалайтын боламыз. Бұл ретте олардың қатысуы тиісті орган басшылығының меритократия қағидаттарына деген ұстанымының көрсеткіші ретінде бағалайтын боламыз, – дейді ҚР мемлекеттік қызмет істері жөніндегі агенттіктің облыс бойынша департаментінің басшысы Равиль Төлебаев.
Оның айтуынша алдағы уақытта әңгімелесу процессін онлайн режимде тікелей эфирде көрсету мәселесін одан әрі кеңейте беретін көрінеді. Бұл саладағы сарапшы ретінде уәкілетті органға, тұтастай алғанда қоғамға кандидаттардың потенциалына көз жеткізе отырып, салыстырмалы талдау жасауға мүмкіндігін береді екен. сонымен қатар, бірлескен іс-қимыл мен сындарлы байланыс конкурс комиссияларының жауапкершілік деңгейін көтерумен қатар, азаматтық қоғамның рөлін артырмақ.
