istockphoto.com
https://turkystan.kz/article/270117-taksi-zurgizusisin-kolikte-temeki-seguge-ruqsat-etpegeni-usin-oltirgen-zolausy-sottaldy
Петропавл қаласында такси жүргізушісін өлтіру ісі бойынша сот үкімі шықты. Айыпталушы тоғыз жылға абақтыға жіберілді, деп хабарлайды turkystan.kz.
Айыпталушы Виталий Глушков 39 жаста. Ол еш жерде жұмыс істемеген, бұрын сотталмаған, бірақ бірнеше рет мас күйінде қоғамдық орында болғаны үшін әкімшілік жауапкершілікке тартылған. Тұратын жері бойынша учаскелік полиция қызметкері оны «қанағаттанарлық» деп сипаттаған.
Іс материалдарына сәйкес, биылғы 8 маусым күні Глушков достарымен бірге Троица мерекесін атап өткен.
Екі бөтелке арақ ішіп, Есіл өзенінің жағасында демалған соң, масайған ер адамдар такси шақырған. Шақыртуға 60 жастағы жүргізуші Андрей Белоконенко келген.
Достарын көрсетілген мекенжайға жеткізгеннен кейін көлікте шылым шегу мәселесіне байланысты жанжал туындаған.
«Сотта Глушковтың досы түсіндіргендей, ол жүргізушімен есептескен соң бірден көліктен шыққан, ал Глушков көлікте қалып, шылым шеккен. Жүргізуші оған салонда шылым шекпеуді айтып, шығуын талап еткен. Алайда Глушков агрессивті мінез көрсетіп, көліктен атып шығып, жүргізушіге бірнеше рет соққы жасаған. Белоконенко жерге құлап түскен, бірақ Глушков соққысын тоқтатпаған. Жүргізуші ес-түссіз қалған кезде ғана айналадағы адамдар жүгіріп келген, ал Глушков оқиға орнынан қашып кеткен», – деді соттағы мемлекеттік айыптаушы.
Жедел жәрдем фельдшерінің айтуынша, оқиға орнына келген кезде зардап шеккен Андрей Белоконенко кома жағдайында болған. Дәрігерлер оның өмірі үшін бес күн күрескенімен, ер адам есін жимастан жансақтау бөлімінде көз жұмған.
Толық нұсқасына гиперсілтеме беруді ұмытпаңыз: https://turkystan.kz/article/270117-taksi-zurgizusisin-kolikte-temeki-seguge-ruqsat-etpegeni-usin-oltirgen-zolausy-sottaldy
