«Жұлдыз» аула клубының ұйымдастыруымен «Қазақ халқының қолөнері- ұлттың айнасы» атты қолөнер байқауы өтті. Талас аудандық білім бөлімінің қолдауымен өткен байқау қатысушыларды шығармашылыққа, ұлттық мәдениетті дәріптеуге және туған елге деген сүйіспеншілікті арттыруға бағытталды. Шарада сөз алған аудандық білім бөлімі әдістемелік кабинетінің әдіскері Сәуле Сағынбекова халқымыздың ғасырлар бойы қалыптасқан мәдени мұрасын дәріптеуде аталмыш байқаудың алар орны ерекше екендігін атап өтіп, сайысқа қатысушыларға сәттілік тіледі.
Байқауға 6 команда қатысып, 4 кезең бойынша сайысқа түсті. Әр команда өз қолдарынан шыққан ерекше өнер туындыларын ұсынды. Қазылар алқасы қатысушылардың ұқыптылығын, қолөнер туындыларына қолданылған материалдарды, киім үлгісі мен шеберлік деңгейін бағалады. Халқымыздың төл өнерінің ұлттық нақышын сақталуы ескерілді.
Байқау қорытындысы бойынша Қаратау қаласындағы мектеп-лицей командасы 1- орынды жеңіп алды. Жүлделі 2- орынды Сәкен Сейфуллин атындағы орта мектебінің командасы иеленсе, 3- орынды Мұхтар Әуезов атындағы орта мектебінің, Шоқан Уәлиханов атындағы орта мектебі және «Жұлдыз» аула клубының командалары өзара бөлісті.
Барлық жүлдегерлер мен қатысушылар Талас аудандық білім бөлімінің арнайы дипломдарымен марапатталды. «Жұлдыз» аула клубы бағалы сыйлықтар табыс етті.
Толғанай Әлжаппар,
Талас ауданы, «Жұлдыз» аула клубының Бұқаралық бөлім меңгерушісі.
