Түркістан облысы, Жетісай ауданы, Алғабас ауылында екі қабатты үй өртеніп, 12 адам қаза тауып, 3 адам ауыр жағдайда ауруханаға жеткізілді, деп хабарлайды Malim.kz.
Таңертең ТЖД-ның «101» пультіне Жетісай ауданы Алғабас ауылындағы екі қабатты тұрғын үйдің өртке оранғаны туралы хабарлама түсті.
Өрт сөндірушілер келген сәтте үй толығымен жанып жатқан. Барлау кезінде іштен ес-түссіз күйдегі үш адам эвакуацияланып, медицина қызметкерлеріне тапсырылды. Сонымен қатар, оның ішінде тоғыз баланы қосқанда, 12 адамның денесі табылды. 9-ы жасөспірім балалар. Ал, 3 адам ауруханаға жедел жеткізілген.
«Медициналық мекемелерге үш адам – екі ересек және бір бала жеткізілді. Барлығы реанимация бөлімінде жатыр, жағдайлары ауыр, бірақ тұрақты. Науқастарға интенсивті терапияның толық кешені жүргізілуде, олардың жағдайы салалық мамандардың толық бақылауында», – деп хабарлады облыстық денсаулық сақтау басқармасы.
Көршілердің мәліметінше, үйдің екінші қабатынан көмек шақырған дауыс естілген. Олар жан-жантағы адамдарды шақырғанша, жарты сағатқа жуық уақыт өткен.
Қазір оқиға орнында барлық жедел қызмет жұмыс істеп жатыр. Тергеу басталып, өрттің шығу себебі анықталуда. Оқиға орнына облыс әкімі Нұралхан Көшеров барып, қайғыдан қан жұтқан отбасыға көңіл айтты.
«Жетісай ауданы Алғабас ауылында болған ауыр қайғылы жағдай бәріміздің жанымызға батты. Өрт салдарынан адам шығыны мен зардап шеккендер бар. Бұл — бүкіл облыс үшін орны толмас қасірет. Мемлекет басшысының тапсырмасына сәйкес үкіметтік комиссия құрылды. Қазір барлық жауапты органдар оқиғаның нақты себептерін анықтау бағытында жұмыс жүргізіп жатыр. Тергеу толық және жан-жақты жүргізілетін болады. Облыс әкімдігі тарапынан зардап шеккендер мен қаза тапқандардың отбасыларына барлық қажетті медициналық, психологиялық және әлеуметтік көмек көрсетілуде. Сонымен бірге марқұмдарды жерлеу рәсімін ұйымдастыруға толықтай қолдау көрсетеміз. Бұл жағдай біздің толық бақылауымызда. Қандай да бір қосымша шаралар қажет болса, жедел іске асырамыз. Қаза болғандардың жақындары мен отбасына қайғырып көңіл айтамын. Жарақат алған азаматтардың тез сауығып кетуін тілеймін. Біз мұндай оқиғалардың алдын алу үшін барлық деңгейде қауіпсіздік шараларын күшейтеміз», – деді Нұралхан Көшеров.
