Скриншот
Маңғыстау ауданында соғыс ардагерлерінің есімдері ауыл көшелеріне берілді: 15 желтоқсан 2025, жаңалықтар Turkystan.kz
Маңғыстау ауданында Ұлы Отан соғысы ардагерлерінің есімдерін ұлықтау мақсатында Жармыш ауылында ел қорғаған ерлердің атына 4 көше берілді, деп хабарлайды turkystan.kz.
Аудан әкімдігінің баспасөз қызметінің мәліметінше, бұл шара Мемлекет басшысының Ұлы Отан соғысындағы Жеңістің 80 жылдығына орай, бір немесе одан да көп орденмен марапатталған соғыс ардагерлерінің есімдерін көше атауына беру туралы тапсырмасына сәйкес ұйымдастырылды.
— Аудан бойынша ауылдардан 12 ардагердің есімі ұсынылып, оның ішінде 10 тұлғаның есімі мақұлданды. Нәтижесінде Жармыш, Онды, Ұштаған, Шебір, Сайөтес ауылдарында соғыс ардагерлерінің аты көшелерге беріліп отыр. Біз осы арқылы кейінгі ұрпаққа олардың ерлігін, майдан даласында от пен оқтың ортасында жүріп, Отан алдындағы борышын адал атқарғанын ұлықтап отырмыз. Ел қорғаған ерлерге тағзым көрсету — біздің міндетіміз, — деді аудан әкімі Ғалымжан Ниязов.
Жармыш ауылында есімі ұлықталған ардагерлердің қатарында 1924 жылы туған майдангер, кейінгі жылдары білім беру саласында қызмет атқарып, ел құрметіне бөленген Биқас Рзаханов, 1927 жылғы ардагер, жауынгерлік жолы мен бейбіт еңбекте көрсеткен үлесімен ел жадында қалған азамат Бақтығұл Итемгенов, Ұлы Отан соғысына қатысушы, ауылдық кеңесте және шаруашылық саласында белсенді еңбек еткен тұлға Балтабай Құрақов және ауыл мәдениеті мен шаруашылығын дамытуға зор үлес қосқан, бірнеше мемлекеттік марапат иегері Нармұхамбет Бөлекбаевтың есімі бар.
Мұндай шара Сайөтес, Шебір, Онды ауылдарында да өтуде. Сайөтесте Ләтіп Қуанышев, Шебірде Қоңыр Тарбақов, Ондыда Мұқыр Ниязұлы, Ұштағанда Ерғали Төлесіновтердің атына да көше берілді.
Ауыл тұрғындары рухани шара туралы «бұл — тарихын құрметтеген халықтың рухани борышы» екенін атап өтті. Енді ардагерлердің ерлігі мен өткен өмір жолы – ел жадында, есімі – туған ауылдың төрінде жаңғырмақ.
Толық нұсқасына гиперсілтеме беруді ұмытпаңыз: https://turkystan.kz/article/272851-mangystau-audanynda-sogys-ardagerlerinin-esimderi-auyl-koselerine-berildi
