«Әрқашан күн сөнбесін!» – балаларға арналған шаттық мерекесі өттіБалғын балалардың шат күлкісі мен көтеріңкі көңіл-күйге толы мерекелік іс-шараға аудан тұрғындары, ата-аналар, ұстаздар мен бүлдіршіндер көптеп қатысты. Мерекелік кештің басты мақсаты – балаларға қуаныш сыйлап, олардың бақытты балалық шағына қолдау көрсету, жас ұрпаққа деген қамқорлықты дәріптеу болды.
Шара барысында жүргізушілер жиналған қауымды мерекемен құттықтап, балалардың әр отбасының бақыты, ел болашағы екендігін ерекше атап өтті. Кештің шымылдығы кішкентай бүлдіршіндердің әсем биімен ашылып, көрермендерге ерекше әсер сыйлады.
Мерекелік жиында аудан әкімі Мұртаза Жалғас Әлижанұлы сөз сөйлеп, барлық балаларды Халықаралық балаларды қорғау күнімен құттықтады. Өз сөзінде жас ұрпақтың амандығы мен жарқын болашағы – мемлекет назарындағы маңызды мәселе екенін айтып, бүлдіршіндерге ізгі тілегін арнады.
Сонымен қатар аудан әкімі балаларға арнайы сыйлықтар табыстап, мерекелік көңіл-күй сыйлады.
Шара соңында балалар арнайы жайылған мерекелік дастарханнан дәм татып, қуанышқа бөленді.
Балалар күлкісі – өмірдің шуағы, елдің ертеңі. Осындай мерекелік іс-шаралар арқылы бүлдіршіндердің жүзіндегі шаттық пен қуанышты көру – баршаға ортақ бақыт.
