1 қазан- Қарттар күніне орай, ауданымызда мереке кең көлемде аталып өтті. Аудандық мәдениет үйінің алаңында басталған шараға келушілердің қарасы мол болды. Батырлар киімін киген қыз — жігіттер рухты көтерсе, қобыз ұстаған қыздары мен Ықылас Дүкенұлы мен Бауыржан Момышұлы, Әлия Молдағұлова, Мәншүк Мәметованың өсиет сөздері ерекше әсерге бөледі. Желтоқсан оқиғасына-40 жыл толуына орай Қайрат Рысқұлбеков пен Ләззат Асанованың отты жырлары оқылғанда тарих жаңғырғандай болды. «Айжанқыз » халықтық бишілер ұжымы «Тәуелсіздік» композициясын мың бұрала билесе, алаңдағы жартылай тігілген киіз үй іші ұлттық нақышта безенділіріп,қазақтың ұлттық тағамдары құрт, ірімшік, т.б. қойылды. «Өрлеу» фольклорлық ансамблінің күй фонында бесік салу, шаш өру, жүн түту, ұршық иіру, күбі пісу салт-дәстүрлері көрсетілді. Алаңда асық ату, қол күресі, садақ ату және арқан тартыс сияқты спорт түрлерінен сайыс ұйымдастырылды.
Шара «Ұлттық мұра – ұрпаққа аманат» аудандық форумымен жалғасты. Фойеде әжелерден құралған топ ән шырқаса, жезтаңдай әнші Мадина Молдабекованың өнер көрсетті. Кеш шымылдығы «Сарысу» және «Саудакент» халық театрларының «Ұлттық мұра – ұрпаққа аманат» театрландырылған көрінісімен ашылды. Аудан әкімі Сәкен Мамытов құттықтау сөз сөйлеп, қарттарға деген қоғамның құрметіне тоқталып, ардагерлер ұйымына 40 жыл толуы ұрпақтар сабақтастығының жалғасы екенін айтты. Мұнан соң облыстық ардагерлер кеңесі төрағасының орынбасары Қонысбай Ильясов, аудандық ардагерлер кеңесінің төрағасы Серік Аппазов та жылы лебіздерін арнады. Ауданымыздың әлеуметтік дамуына қосып жүрген үлесі үшін бірқатар ардагерлер «Ауданға сіңірген еңбегі үшін » , «Ауданның Құрметті ардагері » төсбелгілерімен, республикалық ардагерлер кеңесі төрағасының, облыстық ардагерлер кеңесінің және аудан әкімінің Құрмет грамотасы мен Алғыс хаттарымен марапатталды. Сонымен қатар, аудан басшысы мәдени шараларға атсалысып жүрген «Шабыт » ансамбліне Түркістан қаласына саяхаттауға жолдама берді.
Форум концерттік бағдарламаға ұласып, Жаңатас қалалық балалар өнер мектебі мен аудандық мәдениет үйінің өнерпаздары өнерлерін көрсетіп, көпшіліктің ықыласына бөленді. Аталмыш шараға аудан әкімдігінің ішкі саясат бөлімінің әлеуметтік тапсырыс шеңберінде «Жамбыл облысы жастар ұйымдарының Қауымдастығы” демеушілік көрсетті.
