Батыс Қазақстан облысында «Кублей» серіктестігі шикізат базасын нығайту, ет өңдеу өндірісін кеңейту және қосылған құны жоғары өнім өндіру көлемін арттыруға бағытталған құны 25 млн АҚШ долларын құрайтын жаңа инвестициялық жобаны іске асыруға кірісті.
Жоба аясында компания заманауи суару жүйесімен жабдықталған өз жемшөп базасын құрып, 10 мыңнан 20 мың басқа дейін ірі қара малды бордақылауға арналған алаң салуды жоспарлап отыр.
Аталған базаны қалыптастыру және мал бордақылау бағытын дамыту кәсіпорынның шикізатпен қамтамасыз етілуін арттырып, өндірістің тұрақтылығын нығайтуға және ет өңдеу көлемін ұлғайтуға мүмкіндік береді. Сонымен қатар инвестициялар тек мал шаруашылығын дамытуға ғана емес, жемшөп өндіру, мал бордақылау және ет шикізатын өңдеу бағыттарын өзара байланыстыратын біртұтас өндірістік тізбекті қалыптастыруға бағытталады.
«Кублей» серіктестігі 1992 жылдан бері жұмыс істеп келеді. Бүгінде Қазақстандағы ірі ет өңдеу кәсіпорындарының біріне айналды.
Компания сиыр, жылқы және қой етінен жаңа сойылған, салқындатылған және мұздатылған өнімдер, сондай-ақ консерві өнімдерінің көптеген түрлерін шығарады.
Кәсіпорында 700-ден астам адам жұмыс істейді. 3,5 мың шаруа қожалығымен тұрақты әріптестік орнатып, отандық мал шаруашылығы өнімдерін өндірушілер үшін тұрақты өткізу нарығын қалыптастыруда.
Кәсіпорынның ірі өндіріс орындары Орал қаласында және Батыс Қазақстан облысындағы Рыбцех кенті ауданында орналасқан.
Аумағы 15 мың шаршы метрден асатын консерві зауыты консерві өнімдерінің 100-ден астам түрін шығарады. Оның ішінде ет, ет және өсімдік шикізатынан жасалған сондай -ақ, балық, жеміс-көкөніс, тауық етінен және сүт өнімдерінен жасалған қалбырдағы өнімдер бар. Бір ауысымда осындай 200 мыңға жуық өнім шығарады.
Жалпы аумағы 12 мың шаршы метрді құрайтын етке арналған кешен жылына 20 мың тоннаға дейін ет өңдеуге қауқарлы.
Кәсіпорын заманауи етті сүйектен ажырату желілерімен, мал сою цехымен және жалпы сыйымдылығы 3 мың тонна болатын тоңазыту терминалдарымен жабдықталған.
Компания ет өнімдерін терең өңдеу бағыттарын да дамытып келеді. Кәсіпорында тері өңдеу және ет-сүйек ұнын өндіру цехтары жұмыс істейді. Сонымен қатар техникалық май өндіріледі.
Компания экспорттық әлеуетін де арттырып келеді. Бүгінде консерві өнімдері Қырғызстан, Түрікменстан және Тәжікстан нарықтарына экспортталады.
Шикізат базасы мен өндірісті кеңейту өнім шығару көлемін ұлғайтуға, сондай-ақ қазақстандық өнімдердің сыртқы нарықтағы үлесін одан әрі арттыруға мүмкіндік береді.
Инвестициялық жобаны іске асыру ауыл шаруашылығы өнімдерін өңдеуді дамыту және қосылған құны жоғары тауарлар өндірісін ұлғайту жөніндегі міндеттерге сәйкес келеді.
Ауыл шаруашылығы министрлігі өңдеу өнеркәсібіне инвестициялар тарту, өндіріс көлемін кеңейту, шикізат базасын нығайту және отандық өнімдердің бәсекеге қабілеттілігін арттыру бағытындағы жұмысты жалғастырады.
