Қазақстан халқы жыл сайынғы Жолдауды асыға күтеді, нендей жағымды жаңалықтар бар екенін білгісі келеді. Биылғы Жолдау да халықтың игілігін көздеп, заман заңдылығына сай оң өзгерістерге толы болды десек артық айтпаған боламыз. Мемлекет басшысы Қасым-Жомарт Тоқаев биылғы жылдың 1-қыркүйегінде «Халық бірлігі және жүйелі реформалар — ел өркендеуінің берік негізі» атты Жолдауын жариялап, көптеген түйткілді мәселелердің түйінін тарқатып, болашаққа баратын бағытты айқындап берді. Тәуелсіздіктің 30 жылдығы қарсаңында бұл маңызды құжат уақыттың тынысын, жаһанның жүрісін тап басып, тәуекелге бел байлауға шақырып отыр.
Президент Жолдауының бірінші тарауын пандемиядан кейінгі кезеңдегі экономикалық дамудың жай-жапсарын түсіндіріп, бағыт-бағдарын көрсетті. Тиісті тұлғаларға үлкен жауапкершілік жүктеді. Еліміздің ресурстық әлеуеті әлі де ашылмағанын,геологиялық тұрғыдан зерделену деңгейі төмен екенін қаперден шығаруға болмайтынын айтқан Президент Ұлттық геология қызметін құру керектігін де ескертті. Ол сапалы геологиялық ақпараттың инвесторларға қолжетімділігін арттыру үшін ауадай қажет. Құрылатын орган жер қойнауын кімге және қалай беруді шешетін монополистке айналмауы тиіс делінген саяси құжатта. Және оның қызметі инвесторларға кешенді қызмет көрсетіп, қолдау білдіру екендігі қоса айтылған.
Жер қойнауын тиімді пайдалану, геологиялық барлау және жер қойнауын кешенді зерттеу ісіне жаңа қарқын, тың серпіліс қажет. Осындай ой қозғаған Қ.Кемелұлы ұлттың байлығын пайдалануға беруде оңаша отауда «бармақ басты, көз қыстымен» шешу заңсыз екенін айтып, бұл мәселе бойынша бақылау керек екенін тілге тиек етті.
Сонымен қатар аталған құжатта мал шаруашылығында мәселелер бар екені көрсетіліп, бұл салада жүйелі жұмыс атқару керектігі айтылды. Әсіресе, жем-шөп дайындауға қажетті жер көлемін кеңейту туралы тапсырмасы ата кәсіппен жан бағып отырған ағайынды қуантты. Егіс алқабына әр жылы алуан түрлі дақыл егу талабын сақтауымыз керек. Ол үшін тиісті бақылау керек. Ғарыштық мониторинг және қашықтан зондтау мүмкіндігін мейлінше пайдаланып, жұмысты ширатқанымыз жөн. Жайылымдық жер жөнінде сөз қозғағанда әрбір шаруаның жүрегі дүрсілдейтіні сөзсіз. Оны тиімді пайдаланып жүргендер аз. Мал жаятын жерге қолы тимей жүргендер көп. Мемлекет басшысы өзінің осы Жолдауында осы мәселелерді жедел шешуді тапсырып, Үкіметке үміт артты.
Ауылдағы жандардың әл-ауқатын жақсартуға арналған Жолдауды қолдаймыз. Жүктелген міндет мінсіз атқарылады деп сенеміз.
Мақсат ДЕНГЕЛБАЕВ,
аудан әкімдігі жер қатынастары бөлімінің
бас маманы.
