Жігерлі мұратына жетеді

Егемен елімізде жыл сайын 10 қазан – Мүмкіндігі шектеулі жандардың күні ретінде айрықша аталып келеді. Ел Тәуелсіздігінің 30 жылдығы қарсаңында бұл күнге үлкен мән берілуде. ҚР Президенті Қасым-Жомарт Тоқаев биылғы жылғы халыққа арнаған «Халық бірлігі және жүйелі реформалар – ел өркендеуінің берік негізі» атты Жолдауында: «Сонымен бірге партиялардың сайлау тізімінде квота берілетін азаматтардың санатын кеңейтуді ұсынды: квотаға мүмкіндігі шектеулі азаматтарды да қосу қажеттігін айтты. Біз мұны Мемлекет басшысының мүмкіндігі шектеулі жандарға деген жоғары сенімі мен қалтқысыз қамқорлығының жарқын көрінісі деп бағалаймыз.
Бүгінгі кейіпкерлеріміздің аты-жөні — Әділет Иманбай және Болатхан Рыштаев. Екеуі де Шу қаласының тұрғындары. Екеуі де мүмкіндігі шектеулі жандар. Әділет Асқарұлы 24, Болатхан Қанатұлы 18 жаста. Бұл жігіттер жастайынан, тіпті, бала кезінен дауасы әлі күнге табылмаған дертке шалдықса да өз қатарларымен бірге өмір сүруге аса құштарлық танытып келеді. Осы бір ұлағатты ұлдардың жақындарымен алдын ала телефон арқылы келісімге келсем де, өздерімен жүзбе жүз жолығар алдында ішкі сезімім біртүрлі аласұрды. Бұрын-соңды олармен сұхбаттасып көрмегендіктен көңілінде күдігі мен жанарында мұңы бар шығар деп ойлаған едім, бірақ мен қателескен екенмін. Екеуі де жайдарлы, сабырлы, жігерлі жігіттер болып шықты. Өзара әңгімелесуіміз әсерлігімен әспеттелді. Бұл кездесу аудандық орталық кітапханада өткен-ді.
Ата жолына арқасүйеп, алдымен жасы үлкен Әділет жайлы жан-жақты айтуды жөн көрдім. Ол қаладағы Ы.Алтынсарин атындағы орта мектепті тәмамдады. Әрине басқа оқушылар сияқты күнделікті мектебіне бара алмады. Мұғалімдері оның үйіне келіп, тиісті сабақтарын беріп тұрды. Кей кездері Әділет те қатар-құрбылары сияқты мектепке бара алмағандығына өкініп жүрді. Қол арбаға таңылғандықтан тағдыр тәлкегіне шыдап бағуға да тура келді. Бір атап айтар жай оның қол арбаға 2009 жылы ғана қолы жетті. Осы уақытқа дейін атасы Иманбай, апасы Майгүл және әкесі Асқар Әділетті арқалап, барам деген жеріне жеткізіп отырды. Әсіресе, апасының қамқорлығы көп болды.
Осындай жанашырлықтың арқасында алдына үлкен мақсат қойған Әділет «Құқық және бизнес» колледжінің «Заң» факультетін 2017 жылы ойдағыдай бітірді. Содан бері Шу қаласы әкімі аппаратының кеңсе және қаржы шаруашылығы бөлімінде жұмыс істейді. Осы бөлімнің бас маманы Гүлшат Тәжібаева бізбен телефон арқылы әңгімесінде «Әділет өз қызметін тыңғылықты атқарады. Кеңсеге түскен өтініштер мен хаттарды уақтылы тіркеп отырады. Компьютерді жетік меңгерген»-деді.
Апасы Майгүлдің айтуына қарағанда, Әділетті бұл әкімшілікке өзара келісім шарт бойынша аудандық жұмыспен қамту орталығы орналастырған. Сол себептен осы орталық басшысы Садықбай Көпбаевқа дән ризашылықтарын білдіруде.
Сөз арасында Әділеттен алдағы мақсатын сұрағанымыз бар. Ол біраз ойланып тұрып, болашақта мемлекеттік қызметкер атануды қалайды екен. Оның арманы асқақ екендігін естіп қуанып қалдым.
Келесі кейіпкеріміз Болатханның да өмірден өз орнын таба білуге құлаш сермеп жүргендігі бізді де қанаттандырды. Ол №40 мектепті ойдағыдай аяқтаған соң №10 колледжінің білімгері болып қабылданды.
Осы азамат жайлы аталмыш колледж директорының оқу ісі жөніндегі орынбасары Айнұр Жұмырбаева былай дейді: «Биыл ғана оқуға түскен Болатханның беталысы жаман емес. Сабақтардан қалмайды. Ұстаздарын мұқият тыңдайды. Келешекте абыройы асқан аспазшы болып шығар деген ойдамын. Оның білім алуы мен дер кезінде емделуіне колледж басшылығы баса назар аударады».
Бір қызығы Болатхан да, оның әкесі Қанат та, анасы Гүлжәмилә да, қарындасы Әделя да өнер десе ішкен асын жерге қоятын жандар. Олар ана жылдары аудандық «Бақытты отбасы» байқауына қатысып, жүлделі І-орынды жеңіп алғандығын көрген көрермендер әлі күнге дейін тамсанып айтып жүр. Бір өкініштісі, отағасы мезгілсіз қайтыс болғандықтан кейінгі жылдары мұндай байқауға шыға алмады.
Болатхан өзара әңгімеде спортқа да, би өнеріне де қабілетті екендігін айтып қалды. Балаң жігіттің мұндай қасиеттеріне қуанғаным рас. Бұдан біраз жылдар бұрын Әділет пен Болатханның облыс орталығында өткен дойбы жарысынан ағасының І-орын, інісінің ІІ-орын алғанын естігеніміз бар. Сондай-ақ, бүгінгі кейіпкерлеріміз республикалық «Бәріміз бірдейміз, кемсітуді білмейміз» атты фестиваліне қатысып, жүлделі орындарға қол жеткізгендігі көңілі ояу, көзі ашық жандарға кеңінен мәлім. Сондықтан ел арасында айтылып жүрген «жігерлі мұратына жетеді» деген аталы сөз осы жігіттерге қарап айтылғандай.
Мемлекет тарапынан мүмкіндігі шектеулі жандарға жан-жақты қамқорлық жасау жылдан жылға жақсарып келеді. Алдағы уақытта да осы үрдіс жалғаса береді деген ойдамын. Өйткені жарымжан жандар да қоғам мен мемлекетке өз қолдарынан келгенше көмегін тигізуде. Соның бір жарқын дәлелі, өткен жазда Жапония мемлекетінде әлемдік саңлақ спортшылардың жазғы олимпиада ойындары өткізілгендігі баршаға мәлім. Бұл дүбірлі жарысқа біздің елден жүзге жуық спортшы қатысты. Олардың тек сегізі ғана қола медальға қол жеткізіп, қалың жанкүйерлердің жүрегін ауыртқандай болды. Бұдан кейін сол мемлекетте паралимпиада ойындары өтті. Оған республикамыздан 25 мүмкіндігі шектеулі спортшы қатысқан болатын. Олар ел намысын абыроймен қорғап, алтынға да, күміске де, қолаға да ие болды. Осы мысалдың өзі-ақ мүмкіндігі шектеулі жандарға қамқорлық пен қолдау көрсетілген сайын олардың талай асуларды алатындығын айқындап тұрғандай.
Сөз соңында айтарым, осы мақаланың жазылуына көмек қолын созған мүмкіндігі шектеулі жандардың жанашырлары Рахымбек Малшыбаев пен Клара Алтыбаеваға алғыс білдіремін.