Облыс әкімі Бердібек Сапарбаевтың бастамасымен қолға алынған «Асарлатып үй салу» жобасы ауданымызда да сәтті жүзеге асып келеді. Бүгінгі күнге дейін жеті отбасының үйлі болып, қоныс тойын тойлауы да соның айқын дәлелі болып отыр. Сондай-ақ, өткен аптада ғана аталған жоба арқылы Бірлікүстем ауылы тағы бір түтінге көбейіп, бір отбасы баспаналы болды.
Салтанатты шараға аудан әкімінің орынбасары Серік Сәрсенбеков арнайы барып, игі іске атсалықан ауылдықтарға алғысын білдіріп, жалғызбасты ана Тұрсынбүбі Асыловаға баспананың кілтін табыс етті. Сонымен бірге баянды бастаманың басы-қасында жүріп, демеушілік көрсеткен қайырымды азаматтарды аудан әкімінің Құрмет грамотасымен және Алғыс хаттарымен марапаттады. Шара барысында аудандық мәслихат хатшысы Жасұлан Әбенов пен ауылдық ақсақалдар алқасының төрағасы Әзімхан Ботайұлы сөз сөйлеп, игі шараға ұйытқы болған азаматтарға алғысын жеткізді.
Айта кету керек, «Асарлатып үй салу» жобасы бойынша бүгінгі күнге дейін ауданда жеті үй салынып, әлеуметтік осал топтағы отбасыларға берілген. Жыл соңына дейін 10 ауылдық округте тұрмысы төмен, аз қамтылған және жалғызбасты аналар, асыраушысынан айырылған азаматтар мен мүмкіндігі шектеулі жандарды тұрғын үймен қамтамасыз ету қарқынды жүргізілмек. Тұтастай алғанда, «Асарлатып үй салу» жобасы бойынша өткен жылдың өзінде облыста 99 үйдің құрылысы аяқталып, тиісті иелеріне тапсырылған. Бұл бағыттағы жұмыстардың одан әрі жалғасатынын ескерсек, алдағы уақытта өңірдегі әлеуметтік ахуалдың да жақсара түсетіні сөзсіз.
