Ел Президенті Қасым-Жомарт Тоқаев «Талапты да талантты буынға қуатты елдің иесі болу үшін білім мен білікті болу керек» деп сенім артып отыр. Кез келген ел өзінің келешегін өскелең ұрпағымен байланыстырады. Болашақ — жастардың қолында деген ұранды жиі айтып, елімізде осы мақсаттарда
қолға алынып жатқан жобалар аз емес. Әлемдегі дамыған елдердің қатарына қосылуды мақсат тұтқан, ширек ғасырда ширап, аз ғана уақытта алдыға қарыштап дамыған Қазақстанның ертеңгі үміті, тәуелсіздігін баянды етер көзінің ағы мен қарасы,бірнеше жылдан кейін мемлекеттің бет-бейнесі болатын жастарға көбірек көңіл бөлу — басты міндеттердің бастысы.
Осыған орай “Ұстаздар күні” мерекесі қарсаңында Мұхтар Әуезов атындағы орта мектепте аудандық кәсіподақ комитетінің ұйымдастыруымен “Мамандығым-мақтанышым” атты кездесу кеші өтті. Оған ұстаздық қызметтің қыр-сырын білетін, бүгінде ел алғысына бөленіп жүрген халық қалаулылары және ауданның әр мектебінен жиналған отызға жуық жас маман қатысты.
Берері мол кездесуде алдымен халық қалаулылары Жасұлан Әбенов, Гүлбарам Тұрлыбек, Ақмарал Жандабаева, Ләйла Жүнісәлиева, Тұрар Дүрмановтардың өмірбаяндары тыңдалды. Мұнан кейін әңгіме
ауаны бірден сұрақ-жауапқа ойысып, кеш қонақтары қойылған сұрақтарға көсіле жауап берді.
Ғибратқа толы кездесуде жа стар өнегелі өсиеттерге құлақ түріп, көкейде түрткі болған сұрақтарын кезек-кезек қойысты. Жалпы кездесу бастан-аяқ еркін форматта өтті. Жиын соңында “Бүгінгі кәсіподаққа-белсенді жастар” ұранымен кәсіподақ мүшелігіне жас мамандарды қабылдап, оларға кәсіподақ комитетінің төрайымы Аида Бекмурзина мен халық қалаулылары арнайы сыйлықтарды табыс етті. Сондай-ақ жас мамандар мен халық қалаулылары естелікке суретке түсті.
