Қазақ елінің бүгіні мен ертеңі — алдымызда тәрбиелеп отырған жас ұрпақ екені сөзсіз. Бүгінде білекті де білімді жастарды тәрбиелеп отырған «Балалар-жасөспірімдер орталығының» жас ұландары әр өлкеде бой көрсетіп, өздерін тағы да бір мойындатты.
Атап айтқанда, Ұлы Отан соғысының ардагері Жаманқұлов Толыбайды еске алуға арналған бокстан жасөспірімдер арасындағы халықаралық турнирде 52 келі салмақта өнер көрсеткен Дербес Мағжан мен Ислам Рахимов үшінші орынды, 57 келі салмақта Асмасхан Диас үшінші орынды, 34 келі салмақта Байзілда Нұрхан бірінші орынды иеленді. Сондай-ақ осы жарыс барысында төрешілік жасаған орталықтың «Бокс» үйірмесінің жетекшісі Көпесбай Ернар «Үздік төреші» номинациясымен марапатталды.
Одан бөлек, жуырда үстел теннисінен жасөспірімдер арасында Жамбыл облысы чемпионаты өткен болатын. Жарыста орталық тәрбиеленушісі Серік Ерсін бірінші орынды иеленіп, жеңс тұғырынан көрінді.
Спортшылармен қатар жас өнерпаздар да жасындай жарқырауда. Мәселен өткен аптада Тараз қаласында өткен «Жас сарбаз» республикалық әскери-патриоттық әндер фестивалінің облыстық іріктеу кезеңінде орталықтағы «Саз» үйірмесінің «Алау» вокал тобы бас жүлдені иеленіп, үздік дипломмен марапатталды.
Жуырда Алматы қаласында «Думанды елім» атты халықаралық өнер байқауы өтіп, оған аудан абыройын қорғауға «Балалар-жасөспірімдер» орталығының «Айжұлдыз» би тобы «Қызғалдақ» биімен бас жүлдені, «Мани ашким Дарсия» әніне орындалған биімен бірінші Қазақ эстрада жұлдыздары төрелік еткен байқауда ерекше дайындықпен көзге түсіп, көршілес Түркия елінде өтетін байқауға жолдаманы ұтты. Стамбул қаласында ұйымдастырылатын «Kazakh-turk festival» келер жылдың 4-8 қаңтары күндері өтпекші. Мың бұралған 17 қызды дайындаған орталықтағы «Айжұлдыз» би үйірмесінің жетекшісі Айгүл Альмаханова бұл жарыста да тұғырдан көрінулері үшін қазіргі таңда қызу дайындық жүргізуде.
Б.ЖЕКСЕНБЕКҚЫЗЫ,
«Балалар-жасөспірімдер орталығының» «Жас тілші» үйірмесінің жетекшісі.
