Бүгін облыс әкімдігінің мәжіліс залында аймақ басшысы Бердібек Сапарбаев өңірдегі бірқатар зиялы қауым өкілдерімен, ЖОО басшыларымен, БАҚ және дін өкілдерімен кездесті.
Елімізде болған төтенше жағдайға байланысты орын алған келеңсіздіктерді кеңінен талқылаған кездесуде облыс әкімі мұндай қателікті екінші болдырмау керектігін баса айтты.
«Басымызға түскен қиындықтан бірлігіміздің арқасында арашаландық. Қазіргі таңда халыққа қызмет істейтін мекемелердің бәрі жұмыс істеп жатыр. Осы бұзақылық кезінде халық арасында жақсы жағынан ақпарат таратып, халықты сабырға шақыра білген сіздердің еңбектеріңіз өте үлкен. Оның ішінде аға буын өкілдері халықты сабырға шақырғанын атап айтқым келеді. Бұл біздің республикамызда 30 жылдан бері бірінші рет болып отыр. Әрі бұл алдын-ала дайындалған қылмыстық ұйымның әрекеті екені анық. Сол бұзақылардың қолынан төгілген бейкүнә жандардың қаны үшін бәріміздің жанымыз қиналады. Әрі сол кезде облыс әкімдігінің алдында спортшылар қасқайып, қашпай тұрды. Бұл — жастарға үлкен үлгі. Осы қиыншылықты еңсеру кезінде атсалысқан барша адамдарға рақмет айтамын», деді облыс әкімі Б.Машбекұлы.
Сөз кезегінде аймақ басшысы өңірдегі болып жатқан жағдайды республикаға жария етіп отырған телеарналар мен газеттердің ісіне оң бағасын беріп, алғысын айтты.
Сондай-ақ жастарымызды спортпен, мәдениетпен айналысып, білім алсын деп жүргенде олардың кейбірінің арандатушылыққа ұшырауы өкінішті-ақ екенін, зардап шеккен нысандар қайтадан қалпына келетінін, құрлысшылардың да Байзақ оқиғасынан бері қарай көмек көрсетіп келе жатқаны үшін алғысын айтып, қираған нысандар екі ай ішінде қалпына келтірілетінін жеткізді.
Сонымен қатар кездесуде облыс әкімі: «Мемлекетке қиянат жасауға ешкімнің де құқы жоқ, ертең Алла алдында да, бүгінгі қоғам алдында да оның жазасы ауыр болады», деді.
Қазіргі таңда облыс аумағында 37 блок-бекет қойылған, оның 11-і қалада.
2000-нан астам адам ұсталды, олардың істеген қылмысына қарай тиісті жазасы берілетінін ескертіп, кінәсіздер жазаланбайтынын да айтып өтті.
Жиын барысында облыс басшысы қазіргі таңда коронавирустың «Омикрон» штамының таралуына байланысты сақтықты күшейту керектігін де баса айтты.
«Екінші бір айтатын жағдай, кеше түнде 196 індет жұқтыру дерегі тіркелді. Мұның бәрі біздің босаңсып кетуіміз бен екпе алудың нашарлығын көрсетеді. Бірақ бәріміз өзімізге өзіміз жауапты болуымыз керек. Бәріміз екпеден өтіп, қайта вакцинациялауға да бейжай қарамауымыз керек», деп сөзін түйіндеді облыс әкімі Б.Сапарбаев.
Еркін форматта әңгіме өрбіген кездесуде зиялы қауым өкілдері де сөз алды. Облыстық мәслихаттың хатшысы Махметғали Сарыбеков:«Біз бұл қателіктен сабақ алуымыз керек. Жастарды артына ерте білетін, олармен жұмыс істей білетін зиялы қауым арасынан топ құрып, жастарды білімге, мәдениетке, тәрбиеге жетелейтін көп жұмыс атқаруымыз керек. Өйткені жастар рухани жаңғырмаған, жаңғырса да теріс жағынан жаңғырған», деді.
Және ұсыныс ретінде жастардың болашағына балта шаппай, яғни ақ пен қараны ажыратып, кінәсіз жастарды қудаламауды, жауапқа тартпауды сұрады.
Ал Халықаралық Тараз инновациялық институтының ректоры Ерболат Саурықов: «Бұл жердегі бірінші мәселе ата-ана тәрбиесі болып отыр. Жастар үш топқа бөлінді. Бірінші — білімді, екіншісі — жұмысшы, үшіншісі не білімі, не жұмысы жоқ», деп айтты.
Және сол күні өзінің ел ішінде болғанын, әкімдік маңайындағы тұрғындардың шу шығарушыларға көмек бергенін айтып, халықтың да жауапкершілігі мен мәдениетін көтеру керек екендігін айтты.
Сонымен қатар өнер адамдары да, БАҚ өкілдері де өздерінің ой-пікірлерін ашық айтып, жастар туралы жақсы дүниелерді ортаға салып, олардың кінәсіздерін жазаламауды сұрады.
Кездесуді түйіндеген облыс әкімі қағаз жүзінде емес, іс жүзінде жұмыс істеу керектігін айтып, бүгіннен бастап блок-бекеттердің алына бастайтынын тілге тиек етті.
«Жастар мәселесіне жауапкершілікпен қарап, олардың тәрбиесіне баса мән беруіміз керек. Өйткені саналы, сапалы, білімді ұрпақ біздің келешегіміз», деп түйіндеді кездесуді аймақ басшысы Бердібек Сапарбаев
