Тараз қаласының әкімі Бақытжан Орынбеков «Әділет» партиясының қоғамдық қабылдауы аясында тұрғындарды жеке сұрақтарымен қабылдады.
Кездесуде алдымен тұрғын Патима Ахунова Намаганский көшесіндегі үйінің өртеніп, қирап қалғанын айтып, қалыптасқан жағдайға байланысты көмек сұрады. Тұрғынның өтінішін тыңдаған шаһар басшысы мәселенің мән-жайын жан-жақты зерделеу жөнінде жауапты сала өкілдеріне тапсырма берді.
Қабылдауға келген тағы бір тұрғын Қарлығаш Белғожаева уақытша баспанамен қамтамасыз ету мәселесін айтты. Аталған азаматшаның өтініші негізінде мәселені шешудің жолдарын қарастыру, тиісті әлеуметтік тетіктерді зерделеу жөнінде тапсырмалар берілді.
Келесі кезекте Антонина Григорьева құжаттарын рәсімдеу мәселесімен жүгінді. Қазіргі таңда ол Тараз қаласының «Құмшағал» алабында жалдамалы үйде тұрады. Оның жеке басын куәландыратын құжаттары жоқ. Сонымен қатар анасының заңды құжаттарының болмауына байланысты кәмелетке толмаған қызы Жанель Усупованың да туу туралы куәлігін уақытында рәсімдеу мүмкін болмаған. Аталған мәселенің әлеуметтік маңыздылығын ескере отырып, шаһар басшысы жауапты мемлекеттік органдармен бірлесіп, азаматшаның құжаттарын қалпына келтіру және кәмелетке толмаған баланың қажетті құжаттарын рәсімдеуді заң талаптарына сәйкес қарастыруды жүктеді.
Қабылдауға келген Сара Дулатбаева да тұрғын үй мәселесін алға тартты. Ол 11 жылдан бері жалдамалы үйде тұратынын, зейнетке шығуына бір жыл қалғанын айтып, баспанамен қамтамасыз ету мәселесіне байланысты жәрдем сұрады. Тұрғынның өтінішіне байланысты оның қазіргі тұрғын үй кезегіндегі мәртебесі және қолданыстағы бағдарламалар аясында баспана алу мүмкіндігі зерделенеді.
Қала әкімі әрбір өтінішті мұқият тыңдап, тұрғындардың мәселелерін шешуде заң талаптары мен қолданыстағы мүмкіндіктерді барынша тиімді пайдаланудың маңызын атап өтті. Қоғамдық қабылдау барысында көтерілген мәселелердің барлығы жауапты бөлімдердің назарына алынып, тиісті жұмыстар жүргізу жөнінде тапсырмалар жүктелді.
