Алматыдағы дүрбелең кезінде көптеген адам қаза тапты. Бүлікшілерден бөлек, оққа ұшқандардың арасында әскерилер мен қарапайым азаматтар да бар.
Алматы облысындағы Алмалыбақ ауылы мешітінің бас имамы Қуат Үрпековтің айтуынша, ер немесе әйел болсын, әрбір мұсылманға жаназа намазын оқу парыз саналған. Алайда соңғы сапарға жаназасы шығарылмай аттанатындар да бар.
«Дініміз исламда жаназасы оқылатын және жаназасы шығарылмайтын адамдар тобы бар. Ғалымдар мына 3 топты жаназасы шығарылмайтын адамдар тобына жатқызады (Бұл ҚМДБ-ның жаназа пәтуасында да жазылған): 1) Бүлікшілер. Мұсылмандарға қарсы қару қолданып, соғыс ашқан кісілер. Яғни біздің мемлекетімізде болған жағдай. Тыныш жатқан елге қарсы оқ атып, қарапайым халықты қырып, қаншама жазықсыз адам оққа ұшты. 2) Қарақшылық шабуыл кезінде өлген тонаушылар. 3) Ата-анасын өлтіргендер. Оларға қорлық болу үшін жаназасы оқылмайды. Қарап отырсақ елімізде жазықсыз көп адам өмірден өтіп кетті. Дініміз исламда бүлік шығару — адам өлтіргеннен де ауыр күнә деп Алла Тағала Бақара сүресінде қатаң ескертеді. Яғни мемлекеттің тыныштығын бұзу — бұл өте үлкен бүлік. Олардың жаназасы оқылмайды» , — деді Қуат Үрпеков.
