Су көздерін мақсатты пайдалану, су жүретін каналдар мен арықтарды тазалау бойынша ауданымызда бірқатар жұмыстар атқарылуда. Аудан бойынша сыйымдылығы 338,3 млн. текше метрді құрайтын 19 су қоймасы бар. Оның ішінде: Қызыләуіт, Тамды, Қаратау ауылдық округтеріндегі су қоймалары қысқы және көктем айларындағы қар, жаңбыр суларынан толығады. Бүгінгі күнге Талас өзені бойындағы «Ойық», «Жәдік», «Қазақбай» су қоймаларына 50 пайызға дейінгі көлемде су жинау жұмыстары жүзеге асырылып жатыр. Ағын су мәселесін шешу үшін көршілес Жамбыл ауданындағы «Айтақ» каналы арқылы су жеткізу жұмыстары қолға алынды. 2021 жылы «Жұмыспен қамту жол картасы» мемлекеттік бағдарламасы аясында 146 млн. 425 мың теңгеге 7 канал жөнделді. Оның ішінде, 3 науа (лоток) арықтар ағымдағы жөндеуден өткізілді. Ал, Қызыләуіт ауылдық округіне қарасты «Маятас», «Мешіт», «Сейіт», «Қызылқия» каналдарына механикалық тазалау жұмыстары жүргізілді. Одан бөлек, Тамды ауылдық округіндегі №1, №2 каналдарына және Ақкөл ауылдық округіндегі Р-1 лоток арығына жаңа лотоктар қойылды. Ағымдағы жылға облыс әкімдігінің ауыл шаруашылығы басқармасына 792 млн. 904 мың теңгеге 11 каналды жөндеуге ұсыныс берілген болатын. Нәтижесінде 526 млн. 997 мың теңгеге 8 канал қайта қалпына келтірілетін нысандар қатарына енді. Былтыр 19,9 шақырым болатын 7 каналға механикалық тазалау жұмыстары жүргізілді. Ал, қазір «ҚазСуШар» мекемесі өз тарапынан «Жартас» су қоймасы бөгетінің мүжілген тұстарын және су шығатын шахталы шлюзді нығайтты. Осылайша, жақын маңайдағы тұрғындар ағын су тапшылығынан арылады. Бұдан бөлек, «Ақтоған» каналының қақпасына бетондау жұмыстары мен Қаратау қаласындағы «Кирпичный» су қоймасының қақпасына тазалау жұмыстары жүргізілсе, 11 млн. теңгеге «Жамбыл су қоймалары» мекемесі теңгеріміндегі «Қызыләуіт» және «Шабақты» су қоймаларының дамбалары қалпына келтірілді. Сондай-ақ, «Қазақбай» су қоймасын ретке келтіріліп, «Тамды» су қоймасының дамбасына жөндеу жұмыстары да басталып кетті. Одан бөлек, «Талас-Аса» мекемесі тарапынан 19 млн. 500 мың теңгеге Үшарал ауылдық округі аумағынан өтетін ТХЗ, «Нұрабай» каналына тазалау жұмыстары жасалынды. Нәтижесінде 2000 гектардан аса шабындық жерге судың жайылу мүмкіндігі ашылды. Ал, Қызыләуіт ауылдық округі тұрғындарын судан қорғау мақсатында Тұрлыбай көшесі тұсынан 1 шақырымнан аса дренаж жүйесі қазылды. Сонымен қатар, Кеңес ауылдық округіне қарасты «Бөлекқызыл» қоймасына су қорын жинау мақсатында «Нұралы», Аққұм ауылдық округінде суармалы алқапқа су жеткізу үшін «Есімхан» каналдары механикалық тазалаудан өтті. Жалпы аталған бағытта атқарылған жұмыстар аз емес. Алайда, бұл жұмыстар алдағы уақытта да жалғасын таппақ.
Талас ауданы әкімдігінің баспасөз қызметі
