Үстіміздегі жылдың 9- ақпанында Тараз қаласында Жамбыл облысы әкімдігінің ІСБ «Қоғамдық келісім» КММ-де Өзбек ұлттық-мәдени орталығы қалалық кеңесінің кезекті отырысы өтті. Қатысушылар арасында қалалық Өзбек ұлттық-мәдени орталығының төрағасы Абдырахман Зайнутдинов, Ақордамыздан арнайы келген спикер, Нұр-Сұлтан қалалық Өзбектер этномәдени бірлестігінің төрағасы, ҚХА мүшесі Шерзод Аббозович Пулатов, облыстық Ардагерлер кеңесі төрағасының орынбасары Күләш Әбдікешова, облыстық ҚХА Аналар кеңесінің төрайымы Мухаббат Миражапова және т.б. болды.
Іс-шара барысында жыл ішінде атқарылған жұмыстар, жетістіктер туралы айтылып, алдағы жұмыс жоспарлары талқыланды. Қалалық Өзбек ұлттық-мәдени орталығының атқарған жұмыстарымен қоса көптеген жетістіктері де сөз болды. Мәселен, Тараз қаласы әкімінің сыйлығы байкауында алған бірінші орындары сияқты, т.б. Аталмыш бірлестіктің төрағасы Абдырахман Зайнутдинов орталықтың барлық мүшелерінің ортақ еңбегі мен солардың әрқайсысының қоғамдық қызметке өз үлесін қосқандығының арқасында бірлестіктің ірі жетістіктерге жеткендігін атап өтті. Спикерлер өскелең ұрпақты тәрбиелеу, сапалы білім беру, оның ішінде өзбек мектебінде білімді күшейту, мемлекеттік тілді жастар үшін білудің маңыздылығы, бірлестік ісін жандандыру және жастарды жұмыспен қамтамасыз ету сияқты өзекті мәселелерге ерекше назар аударды. Атап айтсақ, Шерзод Пулатов өз сөзінде өзбек мектебінде оқуды күшейту бойынша шаралар қабылдау қажет екендігіне ерекше назар аударды: -Жаңа деңгейге шығу уақыты келді. Мемлекеттік тілге қатысты өзбек этносы өкілдерінің көпшілігі қазақ тілінде еркін сөйлейді. Жаңа Қазақстанды дамыту жолында әрине, мемлекеттік тілді де бірге дамытамыз. Ендігі кезекте, біз жастарды еңбек және саяси, қоғамдық өмірге тарту тақырыбының аясын кеңейту керекпіз!- деді ол. Сонымен бірге, Жамбыл облысы ҚХА Аналар кеңесінің төрайымы Мухаббат Миражапова да Тараз қаласындағы өзбек мектебінде билингвалды білім беруді (екі тілде – өзбек және қазақ тілдерінде оқыту) енгізу қажеттігін жеткізді. Бұл өзбек мектебінің мәртебесін жоғалтпауы, ал түлектер білім беру кеңістігінде сұранысқа ие және бәсекеге қабілетті болуы үшін қажет екенін де тәтпіштеп баяндап берді. Сондай-ақ, жиынға қатысқан қалалық Ардагерлер кеңесі төрағасының орынбасары Күләш Әбдікешова жастарды патриоттыққа тәрбиелеудің маңыздылығы, әйелдерді қоғамдық жұмысқа белсенді тарту жөнінде пайдалы бағыт-бағдар берді.
Іс-шара соңында қалалық Өзбек ұлттық-мәдени орталығының өкілдерін салтанатты түрде марапаттау рәсімі өтті. Күләш Әбдікешова бірлестіктің 11 өкілін, меценатын белсенді жұмыстары үшін «Тараз қаласының құрметті ардагері» төсбелгісімен марапаттады.
Жамбыл облысы әкімдігінің ІСБ
«Қоғамдық келісім» КММ Баспасөз қызметі орталығы
