©ЭК/Валерий КАЛИЕВ
Алматы қаласы Жетісу аудандық полиция басқармасының майоры Ернат Сабалақов қызметінен босатылды.
2020 жылы митинг кезінде азаматтық белсенді Әсия Төлесовадан зардап шектік деген полицейдің бірі Ернат Сабалақов кабинетінде ішімдік ішкені күні жұмысынан айырылды, деп хабарлайды Шаңырақ инфо Экспресс К.
Бұл туралы журналист Михаил Козачков жазды.
2020 жылы азаматтық белсенді Әсия Төлесоваға «Билік өкілін қорлады» және «Билік өкіліне күш қолданды» деп айып тағылған еді. Ол Алматыдағы митингте полицейлерлердің бірінің фуражкасын қағып жіберді делінген. Сонымен қатар, полицейлердің ар-намысына тиетін сөздер айтқан. Сөйтіп, белсендіден жәбір көрдік деп Нұрбек Темірханов, Мейіржан Тұрғанбек, Ернат Сабалақов, Тасқын Талдыбаев, Ұлан Абибулла, Тілек Төлегенов есімді алты полиция шағымданған. Алматының Медеу аудандық соты сол кезде Әсия Төлесоваға қатысты бір жарым жылға бас бостандығын шектеу жазасы тағайындаған.
Белсенді азаматтан жәбір көрдім дегендердің бірі — Ернат Сабалақов болатын. Ол ішкі істер органдарында 10 жылдан бері қызмет атқарған. Соңғы жұмысы — Жетісу ауданы әкімшілік полиция бөлімінің бастығы. Сабалақовтың есімі осы «Әсия Төлесова ісіне» қатысты шыққан. Ол сот отырысында белсендінің «Оңбаған, сен де оңбағансың. Ешқайсың форма киюге лайық емессіңдер. Жиіркенішті, жиіркенішті мент» деген сөзін «қорлау» деп қабылдағанын айтқан.
Ал 2021 жылы 8 сәуірде майордың өзі кабинетінде ішімдік ішіп отырғаны туралы ақпарат кадр бөліміне түседі. Сол кезде инспекция келіп, хаттама толтырылады. Алматы қалалық Полиция департаментінің бастығы Қанат Таймерденов қызметінен босатады. Бірақ майор сол кезде денсаулығына байланысты еңбек демалысында болғанын айтып, аудандық сотқа шағым түсіреді. Бірақ Сабалақовтың өтініші қанағаттандырылған жоқ.
