Елордада Бас мүфти төрағалығымен өткен Қазақстан мұсылмандары діни басқармасының мәжілісінде биылғы пітір садақа мөлшері 500 теңге болып белгіленді деп хабарлады turkystan.kz.
«Пітір садақаның мөлшері еліміз бойынша 2 келі ұнның орташа бағасымен есептелді. Ал ұнның бағасы мүфтияттің қала және облыс өкілдіктерінің берген мәліметі негізінде анықталды», – делінген ҚМДБ хабарламасында.
Сондай-ақ, жиында наиб мүфти, шариғат және пәтуа бөлімінің меңгерушісі Сансызбай Құрбанұлы биыл қасиетті Рамазан айы 2 сәуірден басталатынын мәлімдеді. Өзбекстан мен Қырғызстан мұсылмандары діни басқармасымен кеңесе отырып, осындай ортақ шешім қабылданған.
Биыл Рамазан айы 2 сәуірде басталып, 1 мамырда аяқталады. 2 мамыр – Ораза айт, ал 27 сәуірден 28 сәуірге қараған түн – Қадір түні болып белгіленді.
