«Президентіміздің заңына бағынбайтын не деген арсыз компания?»: Жеңіс Ысқақова үйінің қасындағы құрылысқа қарсы
Қазақстан еңбек сіңірген қайраткері, танымал әнші Жеңіс Ысқақованы үйінің жанында жүріп жатқан құрылыстың кесірінен 24 сағат бойы тыныштық жоқ екенін айтты деп хабарлады turkystan.kz.
«Өткенде осы видеоны парақшама салған едім. Бүгін тағы салуыма тура келіп тұр. Өйткені, өткенде ғана президентіміз Қасым-Жомарт Кемелұлынан жекеменшік үйлердің қасындағы құрылыстарды тоқтатуды естігенімізде жүрегіміз жарылардай қуанып едік. Бірақ, сол бұйрық мына компанияға қатысы жоқ па деп ойлап тұрмын. Әлде бұл компанияның бастығы шетелде жүр ме екен? Бір Құдай білсін… Президентіміздің заңына бағынбайтын бұл не деген арсыз компания? Мына кран мен үйімнің арасындағы қашықтық 9 метр. 24 сағат бойы тарсыл-гүрсіл тоқтамайды. Мынаны тез-тез бітіріп, өткізу керек болып тұр. Тез-тез бітірсек, бұздырмайды деген өздерінің ойлары бар сияқты», – деді Жеңіс Ысқақова.
Әнші өзі түсірген видеоға отандық бірнеше БАҚ-тың әлеуметтік желідегі аккаунттарын да белгілеген.
