5 маусым күні төрт қазақстандық спортшы АҚШ-тағы Миннеаполисте өткен бокс кешінде максималды жоспарды орындап, қарсыластарын нокаутқа жіберді деп хабарлады turkystan.kz
Әбілхан Аманқұл кәсіпқой бокстағы қадамын жеңіспен бастады. 24 жастағы Аманқұлдың қарсыласы – америкалық Девонте Макдональд. Орта салмақтағы жекпе-жек төрт раундқа есептелгенімен, үшінші кезеңде отандасымыздың жеңісімен аяқталды.
Бокстан Қазақстан ұлттық құрамасының экс-капитаны Абылайхан Жүсіпов те, Әбілхан Аманқұлдың жеңісті жолын жалғастырды. Отандасымыз тәжірибелі мексикалық Эдгар Рамиреспен (18-20-1, 14 КО) кездесті. Жекпе-жек төрт раундқа жоспарланған, бірақ алғашқы үш минутта Жүсіпов қарсыласын нокаутқа түсіріп, жеңіске жетті.
Орта салмақтағы боксшы Бек Нұрмағанбет америкалық Хайнел Уилермен жұдырықтасты. Жекпе-жек алты раундқа жоспарланды, алайда екінші раундта отандасымыздың жеңісімен аяқталды. Ол қарсыласын нокаутқа түсірді. Бұл – Нұрмағанбеттің кәсіпқой бокстағы жетінші жеңісі.
Ал супер жеңіл салмақ дәрежесіндегі қазақстандық боксшы Евгений Павлов мексикалық Алексис Салидомен кездесті. Жекпе-жектің екінші раундында отандасымыздың пайдасына шешілді. Ол қарсыласын нокаутқа түсірді. Павлов кәсіпқой бокста жетінші жеңісіне қол жеткізді.
