Ел үшін еңбек ету зор құрмет, абыройлы міндет. Бүгін халық үшін маңдай терін төгіп, адал еңбегімен ел құрметіне бөленіп жүрген қарапайым, ізетті, мейірімді мемлекеттік қызметшілердің төл мерекесі жоғарғы деңгейде аталып өтті.
Аудандық мәдениет үйінде өткен салтанатты шараға аудан әкімі Марат Сұлтанғалиев қатысып, мемлекеттік қызметшілер мен мемлекеттік қызметтің ардагерлерін құттықтады.
Мемлекеттік қызмет – халықтың сенімін ақтау, ұлтымыздың абыройын асырып, асқақтату. Ұлт мәртебесін көтеретін, ел абыройын асқақтататын мемлекеттік қызметкер болу – мәртебелі міндет. Мемлекеттік қызметкердің еңбегі терең біліктілікті, үлкен жауапкершілік пен төзімділікті талап етеді. Сондықтан, халық Сіздерден адамгершілікті, патриоттық сезімді, заңдылықты бұлжытпай сақтауды күтеді, — деген аудан басшысы шараға қатысушылардың ел игілігі жолындағы қызметтеріне табыс, отбасыларына амандық, бақ — береке тіледі.
Салтанатты шарада мемлекеттік қызметте жемісті еңбек етіп жүрген бір топ азаматтар Жамбыл облысы әкімінің, Сарысу ауданы әкімінің Құрмет грамотасымен, Алғыс хаттарыммен, Мемлекеттік қызмет істері жөніндегі агенттігінің Жамбыл облысы бойынша Департаментінің Алғыс хаттарымен марапатталды.
Сонымен қатар, ел тарихындағы аса маңызды саяси науқан – бүкілхалықтық референдумның жоғарғы деңгейде өтуіне белсене ат салысқан азаматтар Қазақстан Республикасының Президенті Қасым-Жомарт Тоқаевтың, «Аманат» партиясы төрағасының, «Аманат» партиясының Атқарушы хатшысының, Жамбыл облысы әкімінің және «Аманат» партиясының Сарысу аудандық филиалының Алғыс хаттарымен марпатталды.
Бүгінгі мемлекеттік қызметшілер күні мерекесіне орай мемлекеттік қызметкерлер арасында өткізілген аудандық спартакиаданың жүлдегерлеріне марапаттар осы шарада арнайы табыс етілді.
Мерекелік шара концерттік бағдарламаға ұласты.
Сарысу ауданы әкімдігінің баспасөз қызметі
