Облыс әкімі аппаратының «Қоғамдық келісім» мекемесінің ұйымдастыруымен Елбасының «Болашаққа бағдар: рухани жаңғыру» атты бағдарламалық мақаласы аясында «Оңтүстік» өңірлік қолбасшылығы әскерінің жеке құрамына дәріс өткізілді.
Дәріс басталмас бұрын жиылған жұртшылықты облыс әкімі аппаратының «Қоғамдық келісім» мекемесінің ғылыми-сараптамалық тобының бас сарапшысы Альбина Тапаева сәні мен сәулеті келіскен «Достық үйі» ғимаратын аралатып, Елбасы ұсынған «Болашаққа бағдар: рухани жаңғыру» бағдарламалық мақаласының бөлімдеріне сай атаулармен аталған алаңшалармен таныстырды. Ғимарат ішінің бірінші қабатында офицерлер мен сержанттартардан құралған 80 адамға слайд көрсетіліп, Мемлекет басшысының мақаласы негізінде жүзеге асқан жобалар баян етілді.
Бұдан кейін М.Х.Дулати атындағы Тараз мемлекеттік университетінің «Қазақстан халқы Ассамблеясы» кафедрасының меңгерушісі, облыстық Қазақстан халқы Ассамблеясы ғылыми-сараптамалық тобы төрағасының орынбасары Парида Мамедова «Болашаққа бағдар: рухани жаңғыру» тақырыбында дәріс оқыды.
– Елбасы Нұрсұлтан Әбішұлы Назарбаевтың «Болашаққа бағдар: рухани жаңғыру» атты бағдарламалық мақаласы ел дамуының жарқын үлгісі мен нақты қадамдарын көрсететін келелі ой, салиқалы пікір, батыл шешімдерге құрылған маңызды құжат. Аталған мақала негізінде халықтың санасын жаңғырту, ұлттық болмыс пен ұлттық кодтан айырылып қалмай, оны әлемдік құндылықтармен теңестіру, еліміздің игілігіне жарату жолындағы мақсат-мүдделер туралы өзекті мәселе көтеріліп отыр. Осы бағдарламалық мақала негізінде мазмұн ауқымдылығымен, идеологиялық маңыздылығымен құнды «100 жаңа есім», «Жаһандағы заманауи қазақстандық мәдениет», «Қазақ тілін латын әліпбиіне көшіру жұмыстары», «Жаңа гуманитарлық білім. Қазақ тіліндегі 100 жаңа оқулық», «Туған жер», «Қазақстаның қасиетті рухани құндылықтары» және «Қазақстанның киелі жерлерінің географиясы» атты жобалар жүзеге асты, – деді лектор.
Ал облыс көлемінде аталған бағдарлама төңірегінде атқарылған істер бойынша дәріс оқыған «Рухани жаңғыру» жобалық офисінің менеджері Жамиля Байдешова: «Рухани жаңғыру» бағдарламасы аясында облыс бойынша тиісті жоспар бекітіліп, жүйелі жұмыстар атқарылуда.
2017 жылы өңірде «Рухани жаңғыру» бағдарламасы шеңберінде жалпы құны 1,1 миллиард теңгеге 24 жоба ұйымдастырылып, 120 мыңға жуық адам қамтылды.
2018 жылы өңірлік реестрге жалпы құны 1,4 миллиард теңгені құрайтын 149 жоба енгізілді. Оның ішінде жергілікті бюджеттен 369 миллион теңге, демеушілер есебінен 1 миллиард теңге тартылды.
Бүгінге 149 жобаның 115-і жүзеге асырылып, қалған 34 жоба бойынша тиісті жұмыстар атқарылуда. Ұйымдастырылған іс-шараларға 400 мыңға жуық адам қамтылды» – деді.
Жиын соңы аталған мәселелер мен атқарылған жұмыстар негізін талдап, пікір алмасумен аяқталды.
Жамбыл облысы әкімі аппаратының
«Қоғамдық келісім» КММ
баспасөз бөлімі қызметі
