ШҚО-да облыстық маңызы бар жол жөнделмей жатыр. Мердігерлер мұны битумның жоқтығымен, болса да бағасының қымбаттауымен байланыстырады. Көктемнің соңғы айынан бастап жол жөндеу қарқынды жалғасқан. Тек шілденің соңына қарай жұмыс күрт тоқтап, техникалар тоқтап қалды. «Өскемен-Самар» бағытындағы тасжолдың әр жылы тесігі жамалып, қалпы сақталып келген. Алайда биыл жөндеуді қажет ететін бөлігіне жеткенде жолға қажет материал таусылып қалыпты, деп хабарлайды Stan.kz тілшісі.
Күн сайын Өскеменнен Самар ауылына жолаушылар тасымалдайтын Мирас Қанатұлының сөзінше, бірнеше техника қаңтарылып, асфальт төсеп жатқан жұмысшы қарасы көрінбейді.
“Ойық жерлер көлігі барларды әуреге салмай қоймайды. Ұзақ жолдың орта бөлігінде бірнеше шақырымға созылған учаскенің тоз-тозы шығып, қиыршық һәм үшкір тастардан дөңгелек жарылып кете ме деген қорқыныш болады”, – деді ол.
Жуырда ШҚО Жолаушылар көлігі және автомобиль жолдары басқармасы басшысының міндетін атқарушы Нұрбек Тұраров бағаға қатысты пікір білдірген болатын. Оның сөзінше, қазір битумның босату бағасы 215-тен 250 мың теңгеге дейін өскен. Бұл бір тоннасы үшін. Ал осыған дейін бекітілген жобалық-сметалық құжаттамада тоннасына 110-170 мың теңге деп жазылса керек.
“Битум жеткізілсе, техникалар дайын тұр. Қажетті материалдардың болмауынан жұмысшылардың көбін демалысқа қоя бердік”, – деді мердігер компанияның бас инженері Рауан Мұқаев.
Мәлім болғандай, қазіргі уақытта облыстық деңгейдегі «Өскемен-Самар» тасжолының 15 шақырымына орташа жөндеу жұмыстары жүргізілуде. Тамыз айының басынан бері бұл жұмысқа екі мердігер ұйым кіріскен. Содан бері битумның тек жартысын ғана алып, осы уақытқа дейін 4-5 шақырымына ғана асфальт төселді. Жол құрылысында талай жылдан бері жұмыс істеп келе жатқан Қаби Махамбетовтың сөзінше, мұндай мәселе жылда қайталанады. Әралуан себептерден материал жетіспей, мердігерлер кестеден жиі кешігеді.
“Жол жөндеп келе жатқаныма 15 жыл болды, үнемі осындай машақат. Соңғы жылдары тіптен қиындап кетті. Біресе бағасын көтеріп жібереді, біресе битум жоқ. Содан техникалар да тоқтап жатады”, – деді маман.
Мердігерлер бұл мәселені облыстық Кәсіпкерлер палатасында өткен жиын кезінде де көтерген болатын. Ресми мәліметке сүйенсек, биыл жол жөндеуге қатысты 45 жоба аяқталса, осыған қатысты инфрақұрылымды дамыту мақсатында тағы 75 жоба іске асырылып жатыр. Шенеуніктер барлығын уақтылы үлгереміз деп айтқан болатын.
“Басқа материалдар қымбаттап жатқанда, бұған битумды да қосайық. Тіпті бес пайыз емес, бұрынғы бағасынан 20-30%-ға өскен. Мұның есебін біз осылай түгендеп жатқанымызбен, жұмыс сметалық құжаттамада көрсетілгендей жалғасуы керек. Яғни, қанша жерден шығынға батсақ та, құрылыс материалдарын қазіргі бағамен сатып алып, тірлікті соңына дейін жеткізуге тиіспіз”, – деді Рауан Мұқаев.
Биыл аймақтағы облыстық және аудандық маңыздағы 275 шақырым жол түрлі деңгейдегі жөндеуді қажет етеді. Бұған 20 мың тонна битум қажет. Мердігерлердің кейбірі шығынға батса да, қажет материалдарды қазіргі қымбат бағасымен сатып алуға бекінген.
Дайындаған: Әділхан Есімханов
https://stan.kz/shko-tyrgindari-oblistik-manizi-bar-zhol-zhondelmey-zha-369568/
