Тараз қаласындағы Өзбек этномәдени бірлестігінің өкілі, жергілікті меценат көп балалы, әрі жалғызбасты ана Гүлмира Мырзахметоваға пәтер сыйлады. Шаңырақ иесін құттықтай барған облыс әкімі аппараты «Қоғамдық келісім» мекемесінің ұжымы да Ассамблея тарапынан атқарылатын бірнеше бағыттың бірі қайырымдылық екендігін ескере отырып, қуаныш иесінің үйіне ұлттық дәстүрмен шашу шашып, қоныстойымен құттықтай барды. Өз кезегінде Гүлмира Асылқызы жомарттық танытып, баспана бақытына кенелткен демеушіге жүрекжарды алғысын білдірді.
– Балаларыммен қанша жыл пәтерден пәтерге көшіп, көп қиындық көріп қиналдым. Енді міне Аллаға шүкір, баспаналы болдық, бұл күнге де жеттік. Барша тілектес болған жандарға және ең бастысы – күннің суығында басымызға жылы баспана сыйлаған жанға алғысымды білдіремін, – деді ана.
Ал облыс әкімі аппараты «Қоғамдық келісім» мекемесінің жетекшісі Рано Махсұдқызы кәсіпкердің өз ұжымындағы жұмысшысына үй тарту етуі елеулі оқиға екендігін атап өтті.
— Мұндай ауқымды іске ұйытқы болған кәсіпкердің өз аты-жөнін атамауды өтінгенінен-ақ жүрегінің тазалығын байқауға болады. Іскерлік қырымен танылып жүрген азаматтың бір отбасына қолайлы баспана алып беру бастамасы өте құптарлық, өзгелерге үлгі боларлық іс, — деді Р. Махсұдқызы.
«Қоғамдық келісім» мекемесінің медиация кабинетінің меңгерушісі Валентина Николайқызы да осынау игі істің көпке үлгі, ал қамқорлық адамзатқа ортақ қасиет екенін атап, баспаналы болып жатқан Гүлмира Асылқызын құттықтай келе, үй сыйлаған меценатқа жылы лебізін білдірді.
– «Жақсының жақсылығын айт, нұры тасысын!» демекші, бұл азамат өз кәсібін қиын қыстау кезеңдерде бастап, баспанаға мұқтаж жандарға көмек қолын созуда бірінші болып өзін көрсете білді. Оның отандық бизнестің ілгері басуы жолында үлгі ететін көптеген істерін де көріп жүрміз. Ал бүгін міне, өз қаражатына тұрғын үй алып беріп, тағы да бір жанашырлық ісімен бізді тәнті етіп отыр. Сондықтан да біз осындай кең пейілді азаматты мақтан тұтамыз, – деді ол.
Расында да, жатқа жылулық танытып және де есімі мен ісін атамауды қалаған кең пейіл жан бұл қоғамда ілуде біреу шығар?!
Қоныстой қуанышына ортақтасып келген өңірлік Ассамблея және Аналар кеңесінің мүшелері де тілектес болып, үй сыйлаған жергілікті меценатқа ризашылықтарын білдірді.
Бұл күні шаңырақ иесінің отбасында құран оқылып, дәстүрге сай шүкіршілік дастарханы жайылды.
Гүлзат Бекболат
