Мектепке дейінгі балаларды сапалы тәрбие және біліммен қамту – Мемлекет басшысының білім саласына жүктеген басты міндеттерінің бірі. ⠀⠀
Бұл ретте ауданымызда 2 жастан 6 жасқа дейінгі балаларды балабақшамен қамту жұмыстары жүргізілуде. ⠀⠀
Осыған орай, Кеңес ауылында жаңа балабақша бүлдіршіндер үшін есігін ашты. ⠀⠀
Балабақшаның ашылу салтанатына аудан әкімінің орынбасары Нәрікбаев Нұрсұлтан Бақытжанұлы, кәсіпкерлік бөлімінің басшысы Алтынбаев Ахан Көктеубайұлы, аудандық білім бөлімінің әдіскері Майра Егембердиева және ауыл тұрғындары қатысты.⠀⠀
Нұрсұлтан Бақытжанұлы ауыл жұртын қуанышпен құттықтап, жаңа нысанның жұмысына сәттілік тіледі. ⠀⠀
Сонымен қатар кеш қонақтары мен ауыл ақсақалдары да өздерінің ізгі тілектерін арнап, қуанышқа ортақтасқан ағайынға алғыстарын айтты. ⠀⠀
Ары қарай салтанатты түрде лентасы кесіліп, көпшілік жаңа балабақшаны аралап танысты. ⠀⠀
50 орынға арналған балабақшаны ауыл азаматы Әділет Тілеуімбетов өз қаражатына тұрғызған. Бұл шалғайдағы шағын ауылда жаңадан ашылған екінші балабақша. ⠀⠀
Осымен Меркі ауданындағы мектепке дейінгі балаларды балабақшамен қамту көрсеткіші 100 пайызға жетті. ⠀⠀
Жалпы аудан бойынша мектептке дейінгі тәрбие мен білім беретін 39 мекеме бар. Оның ішінде 16-сы мемлекеттік, 13-і жеке меншік балабақша болса, тағы 10 шағын орталық бүлдіршіндер үшін қызмет жасайды. ⠀⠀
Балабақшаға алғашқы күнннен-ақ аяқ басқан бүлдіршіндердің қуанышында шек жоқ. Ән айтып, би билеп көңіл көтерген бүлдіршіндер өздерінің өнерлерімен көпшілікті тәнті етті. ⠀⠀
Ауыл халқының сұранысын орындап, көптің қалауынан шыққан кәсіпкерге ауыл ақсақалы Ақылжан Иманқұлов ақ батасын берді.
