Тіршілікке жан бітіріп жеткен көктемнің алғашқы айындағы Халықаралық қыз-келіншектер мерекесі тараздық сұлулардың сынға түскен байқауымен басталды. «Мөп-мөлдір көздің қарасын, Тараздан ғана
табасың» деп шығыстың шайыры Фирдоуси жырлаған көне шаһардың хас сұлулары тек сырт келбетімен емес, ісмерліктерін, түсінік-пайымдарын да көрсетті.
«Тараздың инабатты аруы-2019» атты қалалық байқауға 13 бойжеткен қатысты. Тараз қаласы әкімдігі ішкі саясат бөлімінің «Жастар ресурстық орталығы» мен «Асыл Арман» ұлттық дәстүр мен өнерді қолдау қоғамдық бірлестігі ұйымдастырған байқауға арулар сырлас жеңгелерімен бірге келіп, шыққан тегі, ата-анасы, өскен ортасын өлеңмен өрнектеп таныстырды. Үйінде анасымен бірге әзірлеген тағамдарын және қолөнер бұйымдарын әкеліп көрсетіп, олардың жасалу жолын түсірген бейнекөрсетілімдерін көптің назарына ұсынды. Киім кию үлгісі, сән-сымбатын да салтанатымен паш етті. Мұндағы басты мақсат – жасөспірім бойжеткендердің бойына ұлттық тәрбиені сіңдіріп, өнер-білімге баулу.
Осындай бірнеше сындардан сүрінбей өткен Тараз қалалық №46 орта мектеп оқушысы Қазына Шакенбаева бас жүлдені жеңіп, 26-27 наурызда өтетін облыстық байқауға жолдама алды. Қазақ қызының иманды, инабатты болмысын сән-салтанаты жарасқан ұлттық киімімен көпшілікке әлеуметтік желі арқылы танытып жүрген, №5 мектеп гимназиясының оқушысы Мерей Әбіл 1-орынның биігінен көрінді. Ал, №60 орта мектептің оқушысы Әнел Бейсехан 2-орынды, №49 мектеп-гимназиясынан келген Әмина Серікбек пен №43 орта мектептің оқушысы Ұлдана Құлжабаева 3-орынды олжалады. Өзге қатысушылар арнайы аталымдармен марапатталды.
Қ.Рахмтуллина
