Татулық пен тұрақтылық болмай табысқа жету мүмкін емес. Сондықтан да алға басу үшін ауызбіршілік ауадай қажет. Бұл тұрғыда «Бақыт бағалағанның басына тұрақтайды» деген аталы сөз тектен тек айтылмаса керек.
Жамбыл облысы әкімі аппаратының басшысы, өңірлік ҚХА төрағасының орынбасары Мәди Мәтеннің аймақтық ҚХА кеңесінің мүшелері мен этномәдени бірлестік жетекшілерімен өткізген кездесуінде де ел-жұрттың ынтымақ-бірлігін нығайтуға қатысты келелі ойлар айтылды.
Жиында Мәди Мейірбекұлы өзіне жүктелген функционалдық міндеттермен таныстыра отырып, алда күтіп тұрған ауқымды жұмыстарды бірлесе атқару туралы идеяларымен бөлісті. Қатысушылардың ұсыныс-тілектерін тыңдап, пікір алмасты.
Басқосуда Жамбыл облысы әкімдігі ішкі саясат басқармасы «Қоғамдық келісім» мекемесінің басшысы Мүбәрак Жинақбаева этномәдени бірлестік жетекшілерінің ақпараттық-түсіндіру және қоғамдық келісім жұмыстарындағы белсенділік туралы және Достық үйінің түйткілді мәселелері жайлы әңгімеледі.
Кездесу барысында өңірлік ҚХА төрағасының қоғамдық орынбасары әрі жиынның модераторы ретінде біз де өз ойымызды ортаға салдық. Сондай-ақ өңірлік ҚХА төрағасының қоғамдық орынбасары Асқарбек Сейлханов, этномәдени бірлестіктердің төрағалары, Тараз қаласының Өзбек мәдени орталығы Абдрахман Зайнутдинов, Жамбыл облыстық «Шиват-цион» Еврейлер мәдени орталығының төрайымы Людмила Корнилина және «Қазақстан Татарлары мен Башқұрттары конгресі» республикалық қоғамдық бірлестігінің Жамбыл облыстық филиалының төрайымы Фарида Нақыш сөз сөйледі.
Сонымен қатар өңірлік «Әулие Ата» Қазақ мәдени орталығы» қоғамдық бірлестігі төрағасының орынбасары Айгүл Кәбиқызы, өңірлік «Ассамблея жастары» қоғамдық бірлестігінің жетекшісі Хамида Тұрдыева баяндама жасап, бірлестіктердің жұмысы жайлы ақпарат берді. Қатысушылар ҚХА мен этномәдени бірлестіктер жұмысының өзекті және перспективалы бағыттарын, жастармен жұмыс, мемлекеттік тілді үйрену, еріктілік туралы мәселелерді талқылады. Еркін форматта өткен басқосуда әралуан сұрақтар да қойылып, нақты жауап берілді.
Гулам Умаров,
облыстық «Қан орталығының» директоры
