Өңірдегі этнос өкілдері тығыз шоғырланған елді-мекендерге ақпараттық- түсіндіру жұмыстарын жүргізу негізінде арнайы іс-шаралар жоспарына сәйкес, Жамбыл ауданының Полатқосшы, Ақбұлым, Жамбыл ауылдық округтерінің тұрғындарымен, этномәдени бірлестік өкілдерімен және этнос жастарымен арнайы ақпараттық-түсіндіру жұмыстары жүргізілді.
Шараға облыс әкімдігі ішкі саясат басқармасының басшысы Ұлана Сламбекова, облыстық прокуратура, қоғамдық кеңес, ақсақалдар, билер, аналар кеңесінің төрағалары, этнос өкілдері, ауыл тұрғындары және этнос жастары қатысты.
Атап айтқанда, қатысушылар қатарында облыс прокуратурасының қоғамдық мүдделерді қорғау басқармасының аға прокуроры А. Жұмабеков, Жамбыл облысы ҚХА Ақсақалдар кеңесінің төрағасы А.Сейілхан, «Қазақстан Республикасы күрдтерінің «Барбанг» қауымдастығы» аймақтық қоғамдық бірлестігінің Жамбыл облысы бойынша филиалы» қоғамдық бірлестігінің төрағасы С.Алиевтер болды.
Кездесудегі басты мақсат — облыс аймағындағы этнос өкілдері тығыз орналасқан мекендерде этносаралық жай-күйді зерделеу.
Жиын барысында этнос өкілдері тарапынан бірқатар әлеуметтік-тұрмыстық мәселелер қозғалып, ұсыныстары мен талаптары да айтылды.
Сонымен қатар, этносаралық қатынасты нығайту, араздық тілін тудырмау, тұрмыстық кикілжіңдердің алдын алу, ең бастысы – Қазақстан мемлекетінің ұлттық құндылықтарына ыждаһаттылықпен қараутурасында түсіндірме жұмыстары жүргізіліп, аталған бас қосуға 240 адам қамтылды.
Бұдан бөлек, іс-шаралар жоспарына сәйкес облыс әкімдігінің ішкі саясат басқармасының «Қоғамдық келісім» мекемесінің «Ғылыми-сараптамалық қолдау» бөлімінің сарапшылары 75 респондентті қамти отырып, Қызылқайнар, Жалпақтөбе, Гродиково, Ақбұлым, Шайқорық ауылдарының тұрғындарына әлеуметтік зерттеулер жүргізді.
Аталған аймақтардың этнос жастарына, ауыл тұрғындарына өңірдегі этносаралық тұрақтылықты қамтамасыз ету, мемлекеттік тудың қолдану заңдылықтарын қатаң ескеру, мемлекеттік рәміздерге аса құрметпен қарау және этносаралық алауыздықты тудыратын жалған ақпарат таратуға жол бермеу жөнінде түсіндірме жұмыстары іске асырылды.
Сонымен бірге, мақсатқа сәйкес, ақпараттық-түсіндіру жұмыстары негізінде, Қызылқайнар, Гродиково ауылдық округтерінің ауылдық тұрғындарымен кездесу ұйымдастырылып, мектеп оқушыларына арналған «Менің елім, Қазақстаным» атты тимбилдинг өткізілді, шараға 150 этнос жастары мен мектеп оқушылары қатысты.
Бұған қоса, Шайқорық ауылы этнос өкілдерінің әлеуметтік ахуалына әлеуметтік зерттеулер жасалып, тұрғындардың жалпы тұрмыстық, идеологиялық жай-күйлері бағдарланды.
Бұғанға дейін Жалпақтөбе ауылындағы Мәдениет үйінде Жамбыл ауданының этномәдени бірлестіктері арасында фестиваль ұйымдастыру сөз болған болатын.
Фестивальде «Вынхуа» дүнгендер , «Барбанг» күрділер, «Ахыска» түріктер этномәдени бірлестіктерінің өкілдері өз өнерлерін ортаға салып, зор белсенділік көрсетті.
Жиын соңы «Өнерім саған Қазақстан» атты патриоттық фестивальмен қорытындыланды.
«Ақпараттық жұмыс және қоғаммен байланыс» бөлімі
