Жалпы «Саясат — ағаш ат» дейді. Алайда сол саясаттың тамырын тап басып, таразы басын тең ұстау оңай шаруа емес. Облысқа Асқар Мырзахметов әкім болып келгелі көп нәрсе өзгерді дейтіндер көп. Оның ішінде әсіресе кадр саясатына сын садағын тартып, «дамбалмен» тұрып даңғара қаққандар аз болмады. Терісін теріс айналдыра кигендердің көңілін күпті қылғаны кадрдың сырттан ағылғаны. Турасын айтсақ, «Шым қаладан шенеуніктер шеруі сап түзеті» деп, «терекке де, бұтаққа да» бағыттап болжам жасады. Әрине, «халық айтса, қалт айтпайды» деген бар. Өз уақыттында бірқатар кадрлар Әулиеатаны бетке алды. Басқармадан бастап, басқа арналарды басқарып, аймақ үшін аз тер төкпеді.
Оларға «сырттан келді» деп көз сығырайта қарағандар да кейіннен сабасына түсті. Адал еңбектің әділ бағасын беріп, бастамаларын бас бармақпен бағалады. Бір сөзбен айтқанда, бастапқыда тасада тұрып тас атқандар сол кадрлардың айналасынан өздері табылды. Олардың бірқатары бүгінде басқа өңірлерде өз жұмысын жалғап жатса, босаған орындар бос қалмай, лайықты иелерін табуда. Асқар Исабекұлы «алысына ат , жақына хат» жіберіп командалық жүйеге көшпей, орынбасыран бастап, қала әкіміне дейін жергілікті жердің мамандарынан тағайындады. Атап айтсақ, алдыңғы аптада облыс әкімдігінің тілдерді дамыту басқармасының басшысы болған Сұлушаш Құрманбековаға облыс әкімінің орынбасары қызметін сеніп тапсырса, сондай-ақ аппарат басшысы Нұржан Календеровті де орынбасары етіп қасына алдырды.
Ал бүгін Тараз қаласының тізгінін Шу ауданының әкімі Қайрат Досаевқа ұстатып, бір жылдары Жамбыл, Шу аудандарын басқарған, кейіннен Тараздың да тірлігін тіктеген Рүстем Дәулетті облыс әкімінің аппарат басшысы етіп қойды. Бұл сөз жоқ, сәуір айындағы сәтті шешімдер! Алайда бұның да астарынан саясат іздеп, алаөкпе болып жатқандар баршылық. Бірақ Асқар Мырзахметовтің аталған тағайындаулары «арықтың суынан акула аңдығандарға» қойылған «Шах» болды. Енді ел болып, «бір жеңнен бас, бір жеңнен қол» шығармасақ, бетімізге басылар «Маттың» да ауылы алыс емес. Сондықтан айналаға лай шашып «лайк» жинағаннан гөрі, жүйесін тапқан жұмысқа жәрдемші болайық ағайын!
