Мойынқұм ауданының әкімі Ермек Карентаев Ақсүйек ауылдық округінің тұрғындарымен жүздесіп, ел ішіндегі өзекті түйткілдерді тікелей халықтан тыңдады. Ашық сұрақ-жауап форматында өткен жиында әр тұрғын өз ойын еркін жеткізіп, ұсыныстарын нақты айтты. Мұндай формат – шынайы жағдайды бүкпесіз көрсететін ең дұрыс алаң.
Бұл жолы тұрғындар алдымен оң өзгерісті атап өтті. Ауыз судың 24 сағат бойы үздіксіз берілуіне халық дән риза екенін жеткізді. Яғни, нәтиже бар – енді сол қарқынды жоғалтпай, қалған ұсақ-түйек мәселелерді реттеу қажет деген ортақ пікір қалыптасты.
Кездесу барысында көше жарығын күшейту, қираған үйлердің орнын тазарту, қоқыс полигонын ашу және ауылға жаңа жедел жәрдем көлігін алу мәселелері көтерілді. Бұл – ауылдың қауіпсіздігі мен тұрмыс сапасына тікелей әсер ететін нақты сұраныстар.
Аудан әкімі айтылған ұсыныстарды мұқият тыңдап, тиісті сала мамандарына нақты тапсырмалар жүктеді. Бірқатар мәселелер кезең-кезеңімен шешілетіні айтылып, жауапты бөлімдерге бақылауды күшейту тапсырылды.
Ақсүйектегі кездесу бір нәрсені анық көрсетті: халық тек талап етпейді, жасалған жұмысты да бағалайды. Ал енді сол сенімді ақтау – негізгі міндет.
Айтылған мәселе жерде қалмайды. Жұмыс жалғасады. ![💪]()
