Бүгін Жамбыл облыстық қан орталығының базасында облыстың бұқаралық ақпарат құралдары өкілдеріне арналған «Баспасөз туры» өтті. Оның барысында қан орталығының бас дәрігері Гулам Умаров қан компоненттерін құюды қажет ететін науқастардың өмірін құтқару үшін қан донорлығының маңыздылығы және донорлық қан қауіпсіздігін қамтамасыз ету жүйесі туралы әңгімелеп таныстырды.Қан орталығының жобалық қуаты – жылына 15,0 мың литрге дейін қан мен оның компоненттерін дайындауға арналған. Кәсіпорын донорлық қан мен оның компоненттерін дайындаумен, қайта өңдеумен, зерттеумен, Жамбыл облысының барлық емдеу-алдын алу ұйымдарын қан өнімдерімен қамтамасыз етумен, сондай-ақ техногендік және табиғи сипаттағы төтенше жағдай кезінде қан компоненттерінің қорын құрумен айналысады.
Бүгінде Қазақстанда қан қызметі мәселелеріне мемлекет басым көңіл бөледі. Қызметті жүйелі реформалау нәтижесінде елімізде аумақтық қағидат бойынша 18 қан орталығы қызмет атқарады. Қазіргі уақытта Жамбыл облысы қан қызметінің клиникалық трансфузиологиясы медициналық ұйымдар жанындағы 21 трансфузиология кабинетімен ұсынылған. Қанды ерікті донациялау Қазақстан Республикасының қан қызметінің басым индикаторлары болып табылады және оның ұлғаюы сапалы, қауіпсіз, қан компоненттерін дайындауға және беруге ықпал етеді. Шетелдік сарапшылардың бағалауы бойынша, Қазақстанның қан қызметі Еуропа елдерінің қан қызметтерінен кем болмай, өз дамуында тамаша нәтижелерге қол жеткізген.
Өтеусіз донорлық жыл сайын миллиондаған адамның өмірін құтқаруға мүмкіндік береді. Бұл өмірге қауіп төндіретін жағдайлардан зардап шегетін науқастардың өмірін ұзартуға және олардың өмір сүру сапасын жақсартуға көмектеседі. Қан мен оның өнімдерін құю – күрделі медициналық және хирургиялық процедуралар кезінде аса қажет. Ол сонымен қатар, ана мен бала денсаулығын сақтау, антрогенді және табиғи апаттарға байланысты төтенше шаралар қабылдау кезінде маңызды рөл атқарады. 2021 жылы 14 767-ден астам адам қан тапсыруға өтініш білдірген. Қанның қауіпсіз компоненттерімен қамтамасыз ету үшін 219 554-тен астам зертханалық зерттеулер жүргізілді.
Журналисттердің сұрақтарына жауап бере отырып, Гулам Мұхтарұлы орталықтың заманауи құралдары және өндірістік қызметте қолданылатын лабораториялық сараптаулар мен донорлық қанды қайта өңдеу технологиясының дәрежесі АҚШ пен Еуропа орталықтарында қолданылатын стандарттарына сәйкес келетінін атап өтті. Осы уақытқа дейін қан қызметін дамыту саласында үлкен жұмыстар атқарылды. Қызметті оңтайландыру — халықаралық стандарттарды тиімді енгізу және нормативтік құқықтық деректерді жетілдіру, ерікті өтеусіз қан донорлығын дамыту сияқты қызметтің негізгі көрсеткіштерін арттыруға мүмкіндік береді. Сол сияқты қан компоненттерін инфекциялық және иммунологиялық қауіпсіздігін қамтамасыз етудің қосымша әдістерінің көлемі де ұлғайып келеді.
Адам мүшелерін ауыстыру кезінде донор мен репициенттің үйлесімділігін тексеруде қолданылатын жаңа зертханалық технологиялар мен әдістер бұқаралық ақпараттар қызмет өкілдерін ерекше қызықтырды. Сонымен қатар олар орталық негізінде ашылған барлық зертханалармен, заманауи қан қызметі дамуының басқа да салаларымен және трансфузиялық терапияның қауіпсіздігін қамтамасыз ету мәселелерімен танысып шықты.
110 адам жұмыс істейтін мекеменің басты қағидасы – «Жамбыл облыстық қан орталығында қан қоры жеткілікті, бірақ донорлар әрқашан қажет!».
Ашық форматта өткен пресс-турға қатысқан журналистер мен блогерлер қан орталығының директоры Г.Умаровқа ризашылықтарын білдірді.
