Нұр-Сұлтан қаласының туған күніне орай облысы әкімі аппаратының «Қоғамдық келісім» мекемесінің ұйымдастыруымен «Ару қала астана!» атты мүмкіндігі шектеулі бүлдіршіндердің суреттерінен көрме ұйымдастырылды.
Көрмені өткізудегі басты мақсат өскелең ұрпаққа патриоттық тәрбие беру, балалар мен жасөспірімдердің шығармашылық әлеуетін дамыту, Қазақстан халқы Ассамблеясының рөлін нығайту, ұлтаралық қатынастардың қазақстандық стандарттарын насихаттау болып табылады.
Көрмеге мүмкіндігі шектеулі балалар, зағиптар мен нашар көретін балаларға арналған «Болашақ», саңыраулар мен нашар еститін балаларға арналған «Мейірім» мектеп-интернаттарының, мектептен тыс жұмыс және балалар шығармашылығы орталығының ерекше білім беру қажеттілігі бар балаларға арналған арнайы топ тәрбиеленушілері қатысты.
Астананың әсем келбетін суреттеген 20 бала 34 жұмыс ұсынды. Олардың ең үздіктері көрме каталогына кірді. Балалардың түрлі-түсті суреттері олардың Астанамен кездесуден алған әсерлерінің ерекше екенін аңғартты.
Ақ Орда, Бейбітшілік пен келісім сарайы, Бәйтерек, Министрліктер Үйі, «Хан шатыр» сауда ойын-сауық орталығының ғимараты, көп қабатты тұрғын үйлер мен кешендер сияқты Нұр-Сұлтан қаласының ең танымал сәулет өнерінің озық үлгілерінің суреттерін бүлдіршіндер қағаз бетіріне түсірді.
Барлық қатысушылар дипломдар, көрменің каталогтары және естелік сыйлықтармен марапатталды.
Назерке Оңғар,
Жамбыл облысы әкімі аппаратының
«Қоғамдық келісім» КММ
баспасөз қызметі
