Қазақ қыздарын құрметтеген. Бесіктен тәлім, төрден орын берген. Есесіне қыз баласы ана боп ардақталған, ұлағатын ұрпаққа арнаған. Бұл, игі дәстүр ғасырдан –ғасырға самғаған. Тарихтан тамыр тартқан тектілік 21 ғасырда да жалғасын тауып келеді.
8- наурыз халықаралық әйелдер күніне орай Баласағұн мәдениет сарайында салтанатты жиын өтті. Оған басшылықта табысты, бизнесте жемісті, өнерде өрісті еңбек етіп жүрген белсенді әйелдер және ардақты аналар қатысты.
Салтанатты жиында нәзік жандылар қауымын көктем меркесімен құттықтаған облыс басшысы Асқар Мырзахметов, әйелдердің қоғамдағы ролі мен сіңірген еңбегін ерекше атап өтті.
– Бүгін ең бірінші аналардың мерекесі. Ана өмірдің тірегі, отбасының қайнар көзі. Барлық ақын-жыраулар аналар үшін жыр жазып, ең азыл қазынаға теңеген. Қалай алып қарасаңда, адам баласы үшін анадан қымбатты, анадан ардақты жан жоқ. Күні кеше ғана өткен «Нұр Отан» партиясының съезінде Елбасы да көпбалалы аналардың әлеуметтік жағдайын жақсарту туралы ауқымды ұсыныстарын айтып, айрықша басымдық берді.
Осы орайда, барлық аналарға алғыс білдіре отырып, дендеріне саулық, отбасыларына бақыт тілеймін. Мереке құтты болсын!, — деді Асқар Исабекұлы.
Облыста мемлекеттік қызмет, кәсіпкерлік пен өзге де салада еңбек ететіндердің 48 пайызын әйелдер құрайды. Олар да өңірдің өсіп- өркендеуіне ат салысып келеді. Салтанатты шараға ҚР Парламенті сенатының облысқа келген бір топ депутаттары да қатысып, «НұрОтан» партиясының сьезінде Елбасы тарапынан айтылған көпбалалы аналарды қолдау мен оларға берілетін көмек жөнінде сөз етті.
Салтанатты жиын барысы өресі биік өнермен өрілді. Тәлім мен тәрбиеге толы театрландырылған қойылым көрсетілді. Сонымен қатар Әулиетаалық өнерпаздар ән мен жырдан шашу шашты.
«Ұлы шаңырақ» — ақпарат
