Облыстық Қазақстан халқы Ассамблеясы мен денсаулық сақтау басқармасының ұйымдастыруымен «Ұлттық домбыра күніне» орай Тараз қаласындағы перзентханалар мен перинаталдық орталықтарда ерекше акция өтті. Шарада мереке күні алғаш болып дүние есігін ашқан нәрестелерге домбыра тарту етілді.
Аталған мереке арқылы «Рухани жаңғыру» ұлттық бағдарламасын одан әрі ілгерілету мен ҚХА ұсынған «Қазақтану» жобасын насихаттауға айрықша басымдық берілуде. Сондай-ақ облыстық Ассамблея халық дәстүрлері мен оның жекелеген элементтерге, бірінші кезекте, өскелең ұрпақтың домбыраға деген құрметін арттыруды басты назарға алуда.
Мереке күні облыстық Ассамблеяның этномәдени бірлестік мүшелері, Аналар мен ақсақалдар кеңестері өкілдерін ең бірінші облыс әкімдігінің денсаулық сақтау басқармасы «Жамбыл облыстық перинаталдық орталығы» қарсы алды. Мұнда Талас ауданы, Ойық ауылының тұрғыны Мадина Бапенова ұл баланы алғаш болып дүниеге әкеліпті. Нәрестеге облыстық Қазақстан халқы Ассамблеясының этномәдени бірлестіктері ҚХА логотипі бар ұлттық аспап – домбыраны салтанатты түрде тарту етті. Әрі сыйлықпен бірге сәбиге жазылған ақ тілек хат қоса берілді. Баланың анасына Аналар кеңесінің төрайымы Мухаббат Миражапова домбыра күнін атап өтудің маңыздылығын түсіндіріп, иығына ақжаулық жапты. Сондай-ақ облыс әкімі аппаратының «Қоғамдық келісім» мекемесінің көпшілік іс-шаралар ұйымдастыру бөлімінің қызметкері, жас ақын Берекет Қосбергенов сәбиге арнап арнау өлеңін оқыды.
Ассамблеялықтар облыстық перинаталдық орталығынан кейін № 1- қалалық көпсалалы аурухананың перзентхана бөлімшесіне келді. Мұнда аталған мереке күні Гүлжайна Алсиева есімді Тараз қаласының тұрғыны Фариза есімді қызбаланы дүниеге әкелген екен. Перзентін бауырына басып, қол-аяғын енді жинап жатқан ана, қызына Фариза есімін, қазақ халқының белігілі ақын қызы, поэзия падишасы Фариза Оғарсынованың құрметіне қойылғанын айтып ағынан жарылды. Нәресте Фаризаға да ҚХА логотипі бар домбыра мен ақ тілек жазылған хат табыс етілді. Артынан жас ақын Берекет Қосбергенов: «Фариза» деп ат қойылған ару қыз, Оңғарсынның Фаризасынан асып түссін», -деп жырдан шашу шашты. Осы тұста аталған перзентхананың аға акушері Аида Жакеева:
-Ассамблеялықтар осынау дәстүрлі іс-шарасын жыл сайын өткізеді. 2018 жылы осы мерекеде домбыраға орыс этносының сәбиі ие болып еді. Ата-анасының әлеуметтік жағдайы өте төмен болатын. Сондықтан, «домбыраны медбикелерге тапсырып орнына балаңа киім-кешек, керек-жарақ заттар алып берейік» дедік. Бірақ, ұлты орыс болсада «қазақтың қара домбырасы баламның алғашқы олжасы, кейін оны домбыра сыныбына беремін» деп анасы ұлттық домбыраны баласының бағына балады,-дейді ақ халатты абзал жан. Ассамблеялықтар Фаризаның анасына да ақ орамал тарту етті.
Дәл осы күні Жамбыл облысы әкімдігінің денсаулық сақтау басқармасының Қалалық перинаталдық орталығында Жамбыл ауданы Шайқорық ауылының тұрғыны Алуа Сейіткәрімова да қыз баланы дүниеге алып келген. Айзереге облыстық Ассамблеясының арнайы домбырасы, ақ тілек құттықтауы және анасына ақ орамал табысталды. Балалары дүниеге келген күннен олжаланып отырғандарын айтып, аналар облыстық Ассамблеяға ақжарма тілектерін жаудырды. Сондай-ақ дәл осы күні дүниеге келген барлық бүлдіршіндерге арнап Аналар кеңесінің мүшелері, этномәдени бірлестік өкілдері ыстық лебіздерін білдіріп, «Болашақтары жарқын болсын, елім, жерім деген азаматтардан болсын!» деп ақсақалдар ақ батасын берді.
— Бала- болашағымыз. Олар — біздің еліміздің ертеңі. Біздер бүгінгі буын ертеңгі буынға осындай жақсы әрекеттерімізбен үлгі бола білуіміз керек. Оларға осындай құндылықтарымызды қастерлеп, қадірлеу керек екендігін сәт сайын саналарына құйып отыруымыз қажет. Бүгін Ассамблеяның арнайы домбыраларына ие болып жатқан барлық сәбилерге біздердің жолымызды берсін, игі істеріміз үлгі болсын демекпін. Саналы, салихалы ұрпақтарымызбен мың жасайық!-дейді Аналар кеңесінің төрайымы Мухаббат Миражапова.
Шара барысында сәбилерге арнап «Радонеж» орыстар қоғамы» қоғамдық бірлестігінің өкілі Антонина Беляева «Анасы бар адамдар» әнін қазақ тілінде шырқап берді. Осылайша мереке күні періштелер мекендеген перзентхана шаттық пен думанның ордасына айналды.
Сонымен қатар, ұлттық домбыра күні тек облыс орталығында ғана емес, аудан көлемінде де кеңінен тойланды. Мереке күні алғаш туылған нәрестелерге Ассамблея домбырасы мен ақ тілек хаттарын табыс ету барлық аудандарда жалғасын тапты.
Назерке Оңғар,
Жамбыл облысы әкімі аппаратының
«Қоғамдық келісім» КММ
баспасөз қызметі
