НҰР-СҰЛТАН. ҚазАқпарат — Нұр-Сұлтанда жас жігіт жүріп бара жатқан көліктің капотында трюк жасаған, деп хабарлайды ҚазАқпарат. Полиция қызметкерлері әлеуметтік желілерге мониторинг жүргізу барысында Instagram желісіндегі стористе жарияланған жол қозғалысы ережелерін өрескел бұзуға қатысты бейнероликті анықтады. Қасақана жол ережесін бұзушылар анықталып, полицияға жеткізілді. Олар 18-19 жас аралығындағы қала тұрғындары екені белгілі болды. «Hyundai Tucson» маркалы автокөлігiнің жүргізушісі ҚР ӘҚБтК 593-бабының 1-бөлігі бойынша жауапкершілікке тартылды. Ал «капоттағы жолаушыға» қатысты ҚР ӘҚБтК-нің 434-бабы бойынша әкімшілік іс қозғалды. Мамандандырылған ауданаралық әкімшілік сотының шешімімен оған 10 АЕК көлемінде әкімшілік айыппұл салынды. Нұр-Сұлтан қаласының полиция департаменті қоғамдық тәртіпті бұзбауды, жүргізушілерге жол қозғалысы ережелерін қатаң сақтауды және басқа көлік құралдарының қозғалысына кедергі жасамауды ескертеді.
Барлық құқықтар қорғалған. inform.kz белсенді сілтемені пайдаланыңыз https://www.inform.kz/kz/astanada-zhas-zhigit-zhurip-bara-zhatkan-koliktin-kapotynda-tryuk-zhasagan_a3898396
